Edon Zhegrova mund të ketë një rol të rëndësishëm në ndeshjen e ardhshme të Juventusit ndaj Napolit, pasi trajneri Luciano Spalletti ka konfirmuar se sulmuesi kosovar do të aktivizohet gjatë ndeshjes, edhe nëse nuk e fillon atë nga minuta e parë.
Juventus po kalon një periudhë të vështirë, ndërsa humbja 2-0 nga Genoa në mesjavë e ka zbritur skuadrën në pozitën e nëntë në tabelën e Serie A.
Në prag të duelit të së dielës ndaj Napolit, Spalletti ka kërkuar një reagim nga futbollistët e tij, duke theksuar nevojën për më shumë dëshirë dhe vendosmëri për të arritur rezultate pozitive.
Kur është pyetur nëse do të bëjë ndryshime në formacion, përfshirë mundësinë që Zhegrova ose Jeremie Boga të startojnë, trajneri italian la të kuptohet se të dy futbollistët do të kenë mundësi të luajnë në këtë përballje. “Edhe nëse nuk e nisin si titullarë, ata do të aktivizohen në pjesën e dytë”, deklaroi Spalletti.
Kjo është një mundësi për Zhegrovën që të kontribuojë në një ndeshje me rëndësi të veçantë për Juventusin, i cili synon të reagojë pas disfatës së fundit dhe të mos humbasë më shumë terren në garën për pozitat e kreut.
Spalletti, ndërkohë, ka kërkuar nga skuadra të shfaqë ekuilibër, guxim dhe dëshirë më të madhe se kundërshtari, duke paralajmëruar se përballja me Napolin do të jetë shumë e vështirë.
