Në ditëlindjen e heroit Zahir Pajaziti, kryetarja e Kuvendit, Albulena Haxhiu, ka kujtuar jetën, veprën dhe kontributin e tij të jashtëzakonshëm në organizimin e rezistencës së armatosur për çlirimin e Kosovës.
Përmes një postimi, Haxhiu ka theksuar guximin dhe përkushtimin e Pajazitit, duke e cilësuar atë si një nga pararendësit e luftës çlirimtare dhe si një nga themeluesit e Ushtrisë Çlirimtare të Kosovës.
Ajo ka rikujtuar se Zahir Pajaziti, që në moshë të re, e lidhte fatin e tij me lirinë e Kosovës, duke kaluar vazhdimisht kufirin për të organizuar dhe përgatitur luftëtarë të rinj.
Së bashku me bashkëluftëtarët e tij, ai ndërmori aksionet e para çlirimtare kundër forcave policore serbe.
Haxhiu gjithashtu ka përmendur rënien heroike të Zahir Pajazitit më 31 janar 1997, në hyrje të fshatit Pestovë, ku, së bashku me Hakif Zejnullahun dhe Edmond Hoxhën, ranë në përballje me policinë serbe.
Sipas saj, rënia e tyre u bë një frymëzim për qindra të rinj e të reja që iu bashkuan radhëve të UÇK-së, ndërsa përpjekja e nisur nga ata vazhdoi nga mijëra luftëtarë deri në çlirimin e Kosovës. “Emri dhe vepra e tij mbeten pjesë e pandarë e historisë sonë,” ka shkruar Haxhiu në postimin e saj.
Burimi origjinal i informacionit: zeri .info
