Albian Ajeti po kalon një periudhë fantastike te FC Lugano, ku ka rikthyer formën dhe instinktin e golashënuesit pas disa muajve të vështirë te Baseli.
Sulmuesi shqiptar ka shënuar gjashtë gola në dhjetë ndeshje me ekipin e ri, duke qenë i përfshirë mesatarisht në një gol çdo 60 minuta.
Ky është një ndryshim i jashtëzakonshëm për 29-vjeçarin, i cili nga janari deri në fund të gushtit kishte realizuar vetëm një gol për Baselin.
Trajneri i Luganos, Mattia Croci-Torti, ka arritur t’i rikthejë vetëbesimin Ajetit, i cili në momentin e transferimit ishte në një periudhë shumë të vështirë.
Ish-trajneri i tij te U21 i Baselit, Thomas Haberli, e njeh mirë karakterin dhe potencialin e sulmuesit dhe ka folur për periudhën e tij të vështirë. “Albianit i duhet besim dhe një marrëdhënie e ngushtë me trajnerin.
Ai është shumë i orientuar drejt familjes dhe e mat performancën e tij kryesisht përmes golave që shënon,” ka thënë Haberli.
Nën drejtimin e tij, Ajeti kishte realizuar 23 gola, më shumë sesa me çdo trajner tjetër në karrierën e tij.
Haberli kujton se Ajeti iu bashkua ekipit të tij në moshën 16-vjeçare dhe gjithmonë kishte ambicie të mëdha për të arritur në ekipin e parë.
Ndërsa te Baseli, situata ishte krejtësisht ndryshe.
Pas fitimit të titullit kampion, Ajeti u përball me kritika të vazhdueshme për paraqitjet e tij si sulmuesi kryesor i skuadrës, ndërsa marrëdhënia me trajnerin Stephan Lichtsteiner u përkeqësua, çka e shtyu të kërkonte një ambient të ri.
Haberli beson se Ajeti nuk i ka humbur asnjëherë cilësitë e tij dhe se tani ka mundësinë të rikthehet në nivelin që kishte treguar në fillimet e karrierës.
Ai madje mendon se është e mundur që sulmuesi shqiptar të përfundojë në krye të listës së golashënuesve në kampionatin zviceran.
Si shembull, ai përmend Haris Tabakovicin, i cili shpërtheu në moshën 28-vjeçare.
Ajeti, i cili në të kaluarën ishte transferuar nga Baseli te West Hami për rreth 12 milionë franga zvicerane, kishte provuar më pas aventurat te Celtic dhe Augsburg, por pa arritur të krijonte vazhdimësi në nivelet më të larta.
Tani, te Lugano, ai duket se ka gjetur ambientin e duhur për të rilindur. “Besoj se tashmë e ka marrë vendimin e duhur duke ardhur te Lugano,” ka përfunduar Haberli.
