Ministri i Arsimit dhe Shkencës, Hajrulla Çeku, ka zhvilluar takime me prindër në Pejë dhe Gjakovë, në kuadër të bashkëbisedimeve për hartimin e Strategjisë së Arsimit 2035+.
Siç bëhet e ditur nga njoftimi i Ministrisë së Arsimit dhe Shkencës, këto takime janë organizuar në bashkëpunim me Këshillin e Prindërve të Kosovës, me qëllim që prindërit të kontribuojnë në përcaktimin e prioriteteve dhe objektivave të strategjisë së re.
Gjatë bashkëbisedimit në Gjakovë, Çeku, bashkë me kryetarin e Këshillit të Prindërve të Kosovës, Besnik Dragusha, diskutuan me prindërit për nevojat, shqetësimet dhe pritjet e tyre lidhur me zhvillimin e arsimit.
Sipas njoftimit, ministri theksoi se përfshirja e prindërve është e rëndësishme për të siguruar që strategjia të pasqyrojë nevojat e nxënësve dhe të komunitetit arsimor.
Dragusha gjithashtu vlerësoi rëndësinë e pjesëmarrjes së prindërve në këtë proces.
Gjatë vizitës në Gjakovë, Çeku dhe zëvendësministri i Arsimit, Muhedin Nushi, vizituan edhe shkollën e re në fshatin Ponoshec, një investim i Ministrisë së Arsimit dhe Shkencës, e cila së shpejti pritet të mirëpresë nxënësit.
Ata gjithashtu vizituan Bibliotekën “Ibrahim Rugova”.
Burimi origjinal i informacionit: zeri .info
