Studentët në Serbi kanë bërë të ditur se kanë marrë informacione për një sulm të mundshëm të inskenuar ndaj redaksisë së medias Informer në Beograd, i cili, sipas tyre, mund të ndodhë gjatë mbrëmjes së sotme.
Përmes një reagimi në rrjetin social X, studentët kanë shprehur dyshimin se incidenti mund të organizohet nga persona të caktuar me qëllim që përgjegjësia t’u atribuohet atyre dhe lëvizja studentore të paraqitet si e dhunshme.
Ata u kanë bërë thirrje qytetarëve që të mos u përgjigjen thirrjeve për veprime të tilla dhe të tregohen të kujdesshëm ndaj informacioneve që mund të përhapen gjatë mbrëmjes.
Studentët kanë theksuar se janë të vetëdijshëm se kujt mund t’i shërbejë një skenar i tillë, duke shtuar se nuk do të lejojnë që lëvizja e tyre të diskreditohet.
Paralajmërimi vjen pas incidentit të së hënës në mbrëmje, kur një grup qytetarësh hyri në ndërtesën e televizionit Informer në Beograd, duke ndërprerë transmetimin e programit.
Ngjarja u shoqërua me përplasje mes protestuesve dhe policisë para objektit.
Kryeredaktori i Informerit, Dragan J.
Vuçiqeviq, gjatë transmetimit të drejtpërdrejtë i kërkoi Ilija Srdanoviqit, bartësit të Listës Studentore, që të ndërhynte për t’i bindur protestuesit të largoheshin.
Srdanoviqi tha se duhej ta verifikonte informacionin, pasi nuk i besonte.
Pas incidentit, studentët në bllokadë u distancuan nga hyrja me forcë në redaksinë e medias, duke theksuar se nuk mbështesin sulmet ndaj mediave dhe institucioneve.
Ata deklaruan se synojnë të luftojnë për lirinë e mediave dhe gazetarinë profesionale përmes institucioneve, ndërsa u kërkuan mbështetësve të tyre të shmangin dhunën dhe të ruajnë qetësinë.
Ndërkohë, ish-presidenti i Serbisë, Aleksandar Vuçiq, e dënoi hyrjen në Informer, duke e cilësuar atë si sulm ndaj lirisë së shprehjes dhe gazetarisë.
Ai u bëri thirrje institucioneve shtetërore të reagojnë, ndërsa qeveria në detyrë dënoi dhunën dhe bëri thirrje për një proces paqësor politik.
