Kryetarja e Kuvendit të Kosovës, Albulena Haxhiu, i ka ftuar shqiptarët e Preshevës, Medvegjës dhe Bujanocit të marrin pjesë në zgjedhjet parlamentare që do të mbahen më 25 tetor në Serbi dhe të mbështesin Koalicionin Shqiptar me numrin 17.
Haxhiu ka theksuar se bashkimi i partive shqiptare në një listë të përbashkët është një hap shumë i rëndësishëm për përfaqësimin politik të shqiptarëve në institucionet e Serbisë.
Në një postim në rrjetet sociale, ajo theksoi se tani partitë shqiptare e kanë bërë pjesën e tyre duke u bashkuar, dhe tani është përgjegjësi e qytetarëve që ta mbështesin këtë bashkim përmes votës.
Ajo vlerësoi se përfaqësimi politik, mbrojtja e të drejtave të shqiptarëve dhe ngritja e zërit kundër padrejtësive janë çështje të rëndësishme për Luginën e Preshevës.
Haxhiu gjithashtu u ka bërë thirrje shqiptarëve që jetojnë dhe punojnë në Kosovë, por që kanë të drejtë vote në Serbi, të udhëtojnë drejt Luginës dhe të marrin pjesë në zgjedhje.
Sipas saj, pjesëmarrja e qytetarëve në votime është jetike për të fuqizuar përfaqësimin e shqiptarëve në Kuvendin e Serbisë.
Partitë shqiptare në Luginë do të garojnë me një listë të përbashkët, e emërtuar Koalicioni Shqiptar.
Në zgjedhjet e vitit 2020, ato arritën të garojnë të bashkuara dhe siguruan tri ulëse në Kuvendin e Serbisë, i cili ka gjithsej 250 deputetë.
Burimi origjinal i informacionit: zeri .info
