Senatorët amerikanë Dick Durbin dhe Jeanne Shaheen do të vizitojnë Kosovën si pjesë e një turneu në Ballkanin Perëndimor, ku do të diskutojnë për çështje të rëndësishme si siguria rajonale, institucionet demokratike, zhvillimi ekonomik dhe marrëdhëniet me Shtetet e Bashkuara të Amerikës.
Durbin, zëvendëskryetar i grupit demokrat në Senatin amerikan, dhe Shaheen, anëtarja demokrate e rangut më të lartë në Komitetin e Senatit për Marrëdhënie me Jashtë, kanë përfunduar një vizitë në Bosnjë e Hercegovinë dhe do të vizitojnë gjithashtu Shqipërinë, Malin e Zi dhe Kroacinë.
Kjo do të jetë vizita e fundit e Durbin si senator amerikan në kuadër të një delegacioni kongresional.
Ai ka vizituar Ballkanin edhe në vitet 1999 dhe 2009.
Gjatë qëndrimit të tyre në rajon, senatorët do të takohen me zyrtarë qeveritarë, përfaqësues diplomatikë amerikanë, pjesëtarë të shoqërisë civile dhe liderë të rinj.
Sipas njoftimit, takimet do të përqendrohen në proceset e anëtarësimit në Bashkimin Evropian, bashkëpunimin me NATO-n, diversifikimin e burimeve të energjisë dhe implementimin e Aktit për Demokracinë dhe Prosperitetin e Ballkanit Perëndimor, i miratuar si pjesë e Ligjit për Autorizimin e Mbrojtjes Kombëtare për vitin fiskal 2026.
Gjatë vizitës në Bosnjë e Hercegovinë, delegacioni kishte planifikuar gjithashtu një vizitë në Qendrën Përkujtimore dhe Varrezat e Srebrenicës në Potoçari, si dhe pjesëmarrjen në një performancë të grupit artistik “House of Good Tones”.
Durbin theksoi se vizita në rajon vjen në një moment të rëndësishëm, vetëm disa ditë pas zgjedhjeve në Bosnjë e Hercegovinë.
Ai vuri në dukje se, ndonëse disa shtete që dolën nga shpërbërja e ish-Jugosllavisë janë anëtarësuar në NATO dhe Bashkimin Evropian, sfidat vazhdojnë edhe tri dekada pas nënshkrimit të Marrëveshjes së Dejtonit. “Vizita jonë do të dëshmojë interesimin e vazhdueshëm të SHBA-së për të parë përparim dhe vazhdim të pajtimit në rajon,” tha Durbin.
Burimi origjinal i informacionit: zeri .info
