Këshilli Prokurorial i Kosovës (KPK) ka vendosur të suspendojë menjëherë kryeprokuroren e Prokurorisë Themelore në Pejë, Lumturije Vuçetaj, në kuadër të hetimeve disiplinore lidhur me trajtimin e rastit të Arlinda Zekajt, e cila dyshohet se është vrarë nga kunati i saj.
Vendimi është marrë më 29 tetor 2026, gjatë mbledhjes së Këshillit Prokurorial, pas kërkesës së Kryeprokurorit të Shtetit, Zejnulla Gashi, për nisjen e procedurës disiplinore ndaj saj.
Sipas vendimit të KPK-së, Vuçetaj është suspenduar nga ushtrimi i detyrave zyrtare me 50 për qind të pagës, deri në një vendim tjetër nga Këshilli Prokurorial.
Kërkesa për hetim disiplinor është bazuar në raportin A.nr.379/2026, të përgatitur nga Koordinatori për Dhunë në Familje në Zyrën e Kryeprokurorit të Shtetit.
Në arsyetimin e vendimit thuhet se Lumturije Vuçetaj, gjatë kohës që ka drejtuar Prokurorinë Themelore në Pejë, ka pranuar kërkesa nga viktima A.Z., e cila tashmë ka ndërruar jetë, dhe ka qenë e vetëdijshme për urgjencën e tyre dhe rrezikun që i kanosej jetës së saj.
Autoriteti kompetent ka konstatuar se Vuçetaj ka qenë e informuar për të gjitha raportet e prokurorëve që kishin trajtuar rastet ku A.Z. ishte palë e dëmtuar, si dhe për raportet zyrtare të Policisë së Kosovës mbi nivelin e rrezikshmërisë ndaj saj.
Po ashtu, vendimi thekson se kryeprokurorja është informuar përmes Këshillit Prokurorial të Kosovës dhe Zyrës së Kryeprokurorit të Shtetit për nevojën e trajtimit të kërkesave urgjente të viktimës.
Megjithatë, sipas arsyetimit të KPK-së, Vuçetaj ka dështuar të ndërmarrë veprimet e kërkuara me ligj dhe nuk ka marrë parasysh seriozitetin e kërkesave të paraqitura nga viktima.
KPK ka vlerësuar se veprimet dhe mosveprimet e kryeprokurores përbëjnë shkelje të nenit 6, paragrafi 1, pika 1.3, si dhe paragrafit 2, pikat 2.1 dhe 2.5 të Ligjit për Përgjegjësinë Disiplinore të Gjyqtarëve dhe Prokurorëve.
Në veçanti, citohet dispozita ligjore që përcakton përgjegjësinë për mosmarrjen parasysh të të drejtave të dëshmitarëve ose palëve të dëmtuara, veçanërisht për marrjen e masave për mbrojtjen e jetës, sigurisë dhe privatësisë së tyre, në përputhje me legjislacionin në fuqi.
Si pasojë e neglizhencës së vazhdueshme të kryeprokurores Lumturije Vuçetaj në trajtimin e kërkesave urgjente të palës së dëmtuar, kanë ndodhur pasojat fatale për tashmë të ndjerën A.Z.
Autoriteti kompetent ka vlerësuar gjithashtu se veprimet e Vuçetajt janë në kundërshtim me Ligjin për Përgjegjësinë Disiplinore të Gjyqtarëve dhe Prokurorëve, si dhe me Kodin e Etikës dhe Sjelljes Profesionale për Prokurorë.
Kryeprokurori i Shtetit, Zejnulla Gashi, më 29 tetor 2026, ka paraqitur KPK-së kërkesën për iniciimin e procedurës disiplinore ndaj Lumturije Vuçetajt, së bashku me rekomandimin për suspendimin e saj.
Suspendimi është konsideruar i nevojshëm për shkak të seriozitetit të shkeljeve të supozuara dhe për të siguruar integritetin dhe efektivitetin e hetimeve disiplinore.
Këshilli Prokurorial e ka miratuar kërkesën dhe ka vendosur për suspendimin e menjëhershëm të kryeprokurores së Pejës, me 50 për qind të pagës.
Vendimi hyn në fuqi ditën e miratimit, ndërsa Sekretariati i KPK-së është obliguar ta publikojë atë në faqen zyrtare të institucionit brenda 15 ditëve.
Burimi origjinal i informacionit: zeri .info
