Presidentja Justina Shiroka-Pula ka kthyer në Kuvend Ligjin për Dhomat e Specializuara, pas kërkesës së Grupi Parlamentar të PDK-së.
Kjo parti e bëri këtë kërkesë me qëllim të plotësimit të disa dispozitave dhe forcimit të sigurisë juridike të ligjit, duke kërkuar që kjo të ndodhte pa “vonesa të panevojshme”.
Në fakt, u caktua një afat prej “katër javësh” për këtë proces.
Megjithatë, deri tani ka kaluar gati një javë dhe ende nuk është ndërmarrë asnjë hap.
Më 22 tetor, Partia Demokratike e Kosovës kërkoi rikthimin e Ligjit për Dhomat e Specializuara dhe Zyrën e Prokurorit të Specializuar për rishqyrtim, pas miratimit të ndryshimeve të tij në një seancë të ngutshme që u mbajt në mesnatën e 6 dhe 7 tetorit, ku u zgjodh edhe presidentja e re.
Sipas kërkesës dërguar presidentes nga Grupi Parlamentar i PDK-së, qëllimi ishte që ligji të plotësohej dhe të forcohej juridikisht. “PDK-ja është krenare për nismën e saj ligjore dhe mbështetjen që ajo ka marrë.
Mbrojtja e UÇK-së, e vlerave të luftës çlirimtare dhe mbështetja për çlirimtarët në Hagë mbeten përgjegjësi të panegociueshme.
Ligji është i finalizuar në pjesën dërrmuese të tij.
Rishqyrtimi synon një verifikim përfundimtar profesional dhe adresimin e elementeve që mund të pengojnë zbatimin e tij.
Kërkesa është për rikthim në Kuvend, jo në Qeveri apo për nisjen e punës nga e para,” thuhej në letrën dërguar Shiroka-Pulës.
PDK thekson se “ky proces duhet t’i shërbejë finalizimit dhe hyrjes së ligjit në fuqi, pa vonesa të panevojshme.” Ata gjithashtu shprehin pritshmëritë për afatin se kur duhet të përfundojë kjo procedurë. “Presim që, ashtu siç e miratuam më 6 tetor, ta miratojmë sërish brenda 4 javësh, duke falënderuar të gjithë ata që e kanë mbështetur këtë ligj dhe që do të kontribuojnë në finalizimin e tij.” Megjithatë, edhe pas gjashtë ditësh që kur Presidentja mori vendimin, diskutimet në Kuvend nuk kanë filluar dhe nuk ka pasur asnjë njoftim për një planifikim të mundshëm.
PDK ka ftuar ekspertët “që kanë shprehur gatishmëri” për të kontribuar, duke përfshirë Avokatin e Popullit, t’i paraqesin propozimet e tyre konkrete.
Vendimi për kthimin në Kuvend është mirëpritur nga Bashkimi Europian, i cili fillimisht kishte reaguar me shqetësim pas miratimit të ndryshimeve të këtij ligji nga Kuvendi i Kosovës në tetor.
Pritjet e BE-së janë që të konsultohet në lidhje me këtë çështje. “Në frymën e letërkëmbimit mes përfaqësueses së lartë të BE-së dhe presidentes së Kosovës, përcakton modalitete të konsultimit me BE-në para ndryshimit të legjislacionit, presim që BE-ja të konsultohet nëse diskutimet rinisin në Kuvend,” tha një zëdhënës i BE-së.
Ndryshimet në Ligjin për Dhomat e Specializuara të Kosovës u bënë pas 21 ditësh protestash, ku u kundërshtua aktgjykimi dënues në shkallë të parë për krime lufte ndaj katër ish-krerëve të UÇK-së: Hashim Thaçi, Kadri Veseli, Jakup Krasniqi dhe Rexhep Selimi.
Ndryshimet në ligj parashohin ndër të tjera ngushtim të juridiksionit të mandatit të Gjykatës, dënime deri në 15 vjet burgim, që shkalla e Supremes të zhvillohet në Kosovë dhe që të dënuarit të jenë subjekt i faljes presidenciale.
Burimi origjinal i informacionit: zeri .info
