Kryeministri i Kosovës, Albin Kurti, ka vlerësuar arritjen e përfaqësuesve politikë shqiptarë në zgjedhjet parlamentare në Serbi, ku Koalicioni Shqiptar arriti të sigurojë dy ulëse në Kuvend me gjithsej 27.670 vota.
Në mbledhjen e 64-t të Këshillit të Përgjithshëm të Lëvizjes Vetëvendosje, Kurti theksoi se ky rezultat përbën më të lartin e arritur nga shqiptarët në Serbi që nga viti 2000.
Ai po ashtu nënvizoi se koalicioni mori 1.233 vota më shumë sesa në zgjedhjet e vitit 2020.
Kurti e lidh këtë sukses me bashkimin e subjekteve politike shqiptare, duke theksuar se ato vendosën interesin e përbashkët para dallimeve partiake. “Shqiptarët, ndonëse pakica e katërt kombëtare për nga popullsia në Serbi, u renditën të dytët për nga votat dhe të parët, së bashku me hungarezët, për nga mandatet ndër 9 listat e pakicave kombëtare.
Ky rezultat është fryt i përbashkimit të subjekteve politike shqiptare, të cilat, pavarësisht dallimeve ndërmjet tyre, vendosën interesin e përgjithshëm mbi atë partiak”, tha Kurti.
Kreu i Qeverisë u ndal edhe te rezultatet e përgjithshme të zgjedhjeve në Serbi, duke përmendur ndryshimet në raportet politike.
Ai informoi se Lista Studentore doli e para, koalicioni i presidentit Aleksandar Vuçiq humbi shumicën parlamentare, ndërsa lista e Ivica Daçiqit nuk arriti të sigurojë përfaqësim në Kuvend.
Kurti vlerësoi se këto rezultate shënojnë humbje për pasardhësit politikë të Slobodan Millosheviqit dhe Vojislav Sheshelit, por theksoi se ende nuk është e qartë se kush do ta marrë pushtetin në Serbi. “Aktualisht, ne e dimë kush e ka humbur pushtetin në Serbi, por ende nuk e dimë kush e ka fituar atë.
Shpresojmë që ky ndryshim politik të shoqërohet edhe me ndryshimin pozitiv të qasjes së Beogradit zyrtar ndaj Republikës së Kosovës dhe shqiptarëve në Preshevë, Bujanoc dhe Medvegjë”, u shpreh ai.
Në fjalën e tij, Kurti përmendi gjithashtu ballafaqimin me të kaluarën, ndryshimin e diskursit politik dhe demokratizimin e institucioneve në Serbi, duke i konsideruar këto si hapa të nevojshëm për normalizimin e marrëdhënieve me vendet fqinje.
Ai theksoi se zbardhja e krimeve të kryera ndaj civilëve shqiptarë, identifikimi i varrezave masive dhe sqarimi i fatit të personave të zhdukur mbeten detyrime ndaj viktimave dhe familjeve të tyre. “Pa të vërtetën për të kaluarën, nuk mund të ndërtohet besimi për të ardhmen.
Ne dëshirojmë marrëdhënie të mira fqinjësore, paqe e bashkëpunim, mbi bazën e barazisë dhe respektit të ndërsjellë.
Prandaj, shpresojmë që zhvillimet e reja të hapin rrugën për normalizimin e plotë të marrëdhënieve ndërmjet Kosovës dhe Serbisë, me njohjen e ndërsjellë”, tha Kurti.
Burimi origjinal i informacionit: zeri .info
