Avokati i Popullit, Naim Qelaj, shprehu sot nevojën urgjente për një debat në nivel kombëtar lidhur me barazinë gjinore, dhunën ndaj grave dhe dhunën familjare, duke theksuar se këto çështje përbëjnë interes kombëtar.
Komentet e tij erdhën gjatë një takimi me Komisionin për të Drejtat e Njeriut, Barazi Gjinore dhe Peticione, ku u trajtua edhe rasti tragjik i vrasjes së Arlinda Zekajt në Vitomiricë të Pejës.
Qelaj theksoi se ngjarja e fundit ka nxjerrë në pah dështimet e mundshme të institucioneve në parandalimin e rasteve të ngjashme.
Ai deklaroi: “Shihni rastin e fundit, ndërhyjnë familjarë që nuk kanë të drejta pronësore dhe vije deri te një rast tragjik, natyrisht me dështimin e shtetit, nëse konstatohet që ka pasur dështime, e po shihet se mund të ketë pasur dështime.” Avokati i Popullit sugjeroi se Kosova duhet të trajtojë këto çështje në një nivel më të gjerë, duke shtuar: “Një prej qëndrimeve të mija dhe rekomandimeve që e kam dhënë është se Kosova ka nevojë për një diskutim në nivel nacional për të vendosur barazinë gjinore, dhunën ndaj grave dhe dhunën në familje si interes nacional dhe jo të diskutohet vetëm në nivel të rasteve të izoluara.” Ai gjithashtu ndau një rast të ndjeshëm, duke theksuar se një grua që kërkonte mbështetje institucionale nuk kishte marrë ndihmë, pasi i ishte thënë se nuk kishte bazë ligjore. “Unë sot dua ta ndaj me ju një shqetësim, kam menduar shumë ta diskutoj publikisht apo jo, sepse është rast shumë i ndjeshëm,” tha Qelaj.
Rasti i Arlinda Zekajt, e cila u vra nga kunati i saj, ka shkaktuar reagime të fuqishme nga qytetarët dhe institucionet.
Protestat për këtë rast po vazhdojnë në qytete të ndryshme të Kosovës.
Në lidhje me ngjarjen, drejtori i përgjithshëm i Policisë së Kosovës, Gazmend Hoxha, dha dorëheqjen, ndërsa disa zyrtarë të tjerë janë suspenduar për shkak të dështimeve në trajtimin e rastit.
