Ballkani ka arritur një fitore të thellë me rezultatin 4-0 në shtëpi ndaj Drenicës në ndeshjen e javës së 12-të në Albi Mall Superligën e Kosovës.
Ekipi i trajnerit Sami Sermaxhaj vazhdon formën e tij të shkëlqyer në kampionat, duke e mposhtur këtë herë Drenicën e Gentjan Mezanit.
Pjesa e parë e ndeshjes u karakterizua nga dominimi i vendasve, të cilët krijuan më shumë raste shënimi.
Ata arritën të shënojnë dy gola, por vetëm njëri prej tyre iu pranua si i rregullt.
Goli i vetëm në këtë pjesë erdhi në minutën e 20-të nga Albin Berisha, i cili shënoi për epërsinë 1-0.
Goli i minutës së 44-të u anulua pas një kontrolli nga VAR-i.
Edhe në pjesën e dytë, therandasit vazhduan të ishin më të mirë, duke krijuar më shumë mundësi për shënim dhe duke arritur të shënojnë edhe tri gola për një fitore të thellë.
Goli i parë në këtë pjesë erdhi vetëm dy minuta pas fillimit, dhe përsëri ishte Berisha ai që gjeti rrjetën për 2-0.
Në minutën e 64-të, braziliani Giovanni shënoi një gol të bukur pas asistimit nga Valentin Serebe, duke e rritur rezultatin në 3-0.
Ndërsa, Diar Vokrri në minutën e 68-të u kujdes për 4-0, që doli të ishte rezultati përfundimtar i takimit.
Me këtë fitore, Ballkani ngjitet në 16 pikë në vendin e gjashtë, ndërsa Drenica mbetet e shtatë me 11 pikë.
