Kryetarja e Kuvendit të Kosovës, Albulena Haxhiu, ka pritur në një takim përfaqësueset e Rrjetit të Grave të Kosovës, ku kanë diskutuar për avancimin e barazisë gjinore dhe fuqizimin e të drejtave të grave.
Në një postim në Facebook, Haxhiu bëri të ditur se gjatë këtij takimi është folur për prioritetet e agjendës gjinore parlamentare, për hartimin e ligjeve nga një perspektivë gjinore, si dhe për forcimin e rolit mbikëqyrës të Kuvendit në zbatimin e këtyre ligjeve.
Ajo shprehu përkushtimin e saj që gjatë kësaj legjislature të punohet më shumë në avancimin e kësaj agjende, në bashkëpunim të ngushtë me organizatat e grave. “Shpreha vullnetin dhe përkushtimin tim që gjatë kësaj legjislature ta çojmë më tej këtë agjendë, në bashkëpunim të ngushtë me organizatat e grave, duke u siguruar që barazia gjinore të zërë vendin që i takon në punën dhe vendimmarrjen e Kuvendit,” theksoi Haxhiu.
Kryetarja e Kuvendit gjithashtu vlerësoi punën shumëvjeçare të Rrjetit të Grave të Kosovës dhe të 106 organizatave anëtare, duke theksuar rëndësinë e angazhimit të tyre për zbatimin e të drejtave të grave në praktikë.
Ajo theksoi se është veçanërisht e çmuar këmbëngulja e këtyre organizatave për të siguruar që të drejtat e garantuara me ligj të mos mbeten vetëm në letër, por të gëzohen nga gratë në jetën e përditshme.
Burimi origjinal i informacionit: zeri .info
