Ministri i Punës, Familjes dhe Vlerave të Luftës Çlirimtare, Andin Hoti, ka zhvilluar një takim me përfaqësues të Ministrisë Federale Gjermane për Bashkëpunim Ekonomik dhe Zhvillim (BMZ) dhe të GIZ-it, ku janë diskutuar bashkëpunimi aktual dhe prioritetet për vitet e ardhshme.
Hoti shprehu mirënjohjen e tij për mbështetje të vazhdueshme që Gjermania ofron, veçanërisht në fushat e punësimit, aftësimit profesional dhe fuqizimit ekonomik të grave.
Ai gjithashtu prezantoi prioritetet e ministrisë në lidhje me reformimin e shërbimeve të punësimit, zhvillimin e ndërmarrjeve sociale, digjitalizimin e shërbimeve dhe mbështetje për familjet.
Gjatë vizitës, Hoti mori pjesë në ceremoninë përmbyllëse të projektit për zhvillimin e aftësive në agrobiznes dhe energji solare, të realizuar nga organizata Kosova Women for Women, në bashkëpunim me Agjencinë e Punësimit të Republikës së Kosovës (APRK) dhe me mbështetje nga GIZ-i, përmes programit Fit for Jobs II.
Sipas njoftimit, në kuadër të këtij projekti, 99 pjesëmarrës, nga të cilët 69 gra, përfunduan trajnimet, ndërsa pesë prej tyre përfituan grante për zhvillimin e bizneseve të tyre.
Hoti theksoi se synimi është thellimi i partneritetit me Gjermaninë, me qëllim të krijimit të më shumë mundësive për punësim dhe ofrimin e shërbimeve më cilësore për qytetarët, duke u përshtatur me rrugën e Kosovës drejt integrimit evropian.
Burimi origjinal i informacionit: zeri .info
