Thirrje për Mobilizim: Shqiptarët e Luginës së Preshevës Të Dalin në Zgjedhje

VLEN i bën thirrje shqiptarëve të Luginës së Preshevës që të dalin masivisht në zgjedhjet parlamentare të 25 tetorit në Serbi dhe të mbështesin listën e përbashkët të partive politike shqiptare.

Partitë shqiptare në Maqedoninë e Veriut po ashtu kanë bërë thirrje për pjesëmarrje në zgjedhje, duke theksuar se në këtë mënyrë, shqiptarët kanë mundësinë të shkruajnë histori.

Bashkimi tashmë është bërë realitet.

Tani është koha që ky bashkim të dëshmohet përmes votës, mobilizimit dhe përfaqësimit sa më të madh në Parlamentin e Serbisë.

Apelojmë veçanërisht te shqiptarët e Luginës që jetojnë në Maqedoninë e Veriut, që të udhëtojnë drejt vendvotimeve të tyre dhe ta ushtrojnë të drejtën e votës.

Urojmë që ta kthejmë bashkimin në forcë politike dhe 25 tetorin në një ditë historike për shqiptarët e Luginës!

Synimi është përfaqësimi më i madh shqiptar në Kuvendin e Serbisë, thuhet në deklaratën e lëshuar nga VLEN.

Edhe kryetari i Bashkimit Demokratik për Integrim, Ali Ahmeti, i ka bërë thirrje shqiptarëve në Preshevë, Bujanoc, Medvegjë dhe vendbanimet e tjera që të marrin pjesë masivisht në zgjedhjet parlamentare të 25 tetorit në Serbi.

Në një postim në Facebook, Ahmeti ka theksuar rëndësinë e përfaqësimit politik të shqiptarëve në Parlamentin e Serbisë, sidomos në mbrojtjen e të drejtave kombëtare, gjuhësore dhe qytetare. “Përfaqësimi politik i shqiptarëve në Parlamentin e Serbisë ka rëndësi të veçantë për mbrojtjen e të drejtave kombëtare, gjuhësore dhe qytetare, si dhe për ngritjen e shqetësimeve lidhur me diskriminimin, padrejtësitë dhe sfidat me të cilat përballen shqiptarët në këto treva,” ka shkruar Ahmeti.

Burimi origjinal i informacionit: zeri .info