AKP Reagon ndaj Shkrimeve për Shitjen e Pronave në 2025: Sqarime mbi Procedurat dhe Ligjshmërinë

Agjencia Kosovare e Privatizimit (AKP) ka dhënë një përgjigje lidhur me një artikull të publikuar në media, i cili trajton shitjen e pronave gjatë vitit 2025.

AKP e cilëson këtë shkrim si një sërë pretendimesh të shoqëruara me informacione të pasakta dhe interpretime njëanshme.

Sipas agjencisë, mënyra se si janë paraqitur këto informacione krijon një perceptim të gabuar rreth ligjshmërisë dhe transparencës së procedurave, duke rrezikuar keqinformimin e opinionit publik.

Në reagimin e saj zyrtar, AKP sqaron se rastet e trajtuara lidhen me shitje direkte, të cilat janë realizuar në përputhje me Rregulloren nr. 08/2025 për shitjen direkte të aseteve të caktuara të ndërmarrjeve shoqërore, dhe jo për shitje me negocim direkt.

Agjencia thekson se rregullorja përcakton kushtet, kriteret dhe procedurat për shitjet direkte, duke marrë parasysh rrethanat specifike faktike dhe juridike të aseteve përkatëse.

AKP gjithashtu vlerëson se rrethanat që kanë kushtëzuar realizimin e këtyre shitjeve nuk janë pasqyruar plotësisht.

Sipas saj, ndonëse janë siguruar dokumentet për 54 raste të shitjeve direkte gjatë vitit 2025, në raportimin përkatës janë veçuar vetëm pesë raste, pa u paraqitur rrethanat specifike të secilit rast.

Qëllimi i reagimit nga AKP është të sqarojë faktet dhe bazën ligjore të procedurave, në funksion të informimit të drejtë, objektiv dhe të plotë të qytetarëve.

Burimi origjinal i informacionit: zeri .info