Avokati i Popullit, Naim Qelaj, ka shprehur shqetësime të rëndësishme lidhur me mungesën e transparencës dhe llogaridhënies së Dhomave të Specializuara të Kosovës, gjatë prezantimit të raportit ex officio për këto Dhomat dhe Zyrën e Prokurorit të Specializuar.
Në një tryezë diskutimi në Prishtinë, Qelaj ka theksuar se, sipas raportit, këto Dhomat nuk i janë nënshtruar monitorimit dhe kontrollit demokratik nga institucionet e Republikës së Kosovës. “Gjykata Speciale nuk i është nënshtruar monitorimit dhe kontrollit demokratik nga institucionet e Republikës së Kosovës, duke krijuar mungesë të transparencës dhe llogaridhënies ndaj qytetarëve dhe institucioneve të Kosovës,” ka thënë ai, duke cituar raportin.
Sipas tij, mungesa e një elementi vendor dhe mbikëqyrjes nga institucionet e Kosovës ngre shqetësime edhe për respektimin e standardeve për një proces të drejtë dhe të paanshëm.
Qelaj ka kërkuar nga financuesit e Gjykatës Speciale që të shqyrtojnë të gjitha provat dhe vlerësojnë drejtësinë e procesit gjyqësor ndaj ish-krerëve të Ushtrisë Çlirimtare të Kosovës (UÇK). “Kam kërkuar nga financuesit e kësaj gjykate t’i shqyrtojnë të gjitha provat dhe të binden se kjo gjykatë nuk është e drejtë,” është shprehur Qelaj.
Ndërsa, këshilltari i lartë juridik në Departamentin për Çështje Juridike të IAP-së, Burim Tahiri, ka theksuar se “raporti nuk ka për qëllim ndërhyrjen në rastet që po trajtohen pranë Dhomave të Specializuara, por ngre shqetësime lidhur me standardet e përcaktuara për një gjykim të drejtë dhe të paanshëm, lirinë dhe sigurinë, efikasitetin e mjeteve juridike, si dhe transparencën dhe llogaridhënien institucionale.” Raporti i publikuar nga Avokati i Popullit trajton çështje të ndryshme si kohëzgjatjen e paraburgimit, barazinë e armëve mes palëve, pranueshmërinë e provave, monitorimin e komunikimeve dhe pavarësinë e mekanizmave mbikëqyrës.
Në mesin e rekomandimeve, Avokati i Popullit kërkon që Kuvendi dhe Qeveria e Kosovës të mbështesin krijimin e një mekanizmi të pavarur dhe profesional për monitorimin e procedurave gjyqësore në Dhomat e Specializuara.
Gjithashtu, raporti rekomandon që shqetësimet e identifikuara t’u adresohen Këshillit të Evropës dhe mekanizmave të tjerë ndërkombëtarë.
Raporti ex officio ka për qëllim të trajtojë çështjet e transparencës, llogaridhënies dhe respektimit të standardeve të procesit të drejtë në funksionimin e Dhomave të Specializuara dhe Zyrës së Prokurorit të Specializuar.
Burimi origjinal i informacionit: zeri .info
