Organizata e Veteranëve të Luftës së UÇK-së ka reaguar ndaj kritikave dhe debateve të fundit që lidhen me ndryshimet në Ligjin për Dhomat e Specializuara, të miratuara nga Kuvendi i Kosovës.
Në një reagim publik, organizata vlerëson se deklaratat kundërshtuese ndaj këtyre ndryshimeve janë “sa të nxituara, aq edhe të pabazuara në një shqyrtim serioz juridik”.
Sipas Veteranëve të UÇK-së, deri më tani nuk është publikuar ndonjë analizë apo studim i mirëfilltë juridik që do të argumentonte se ndryshimet e miratuara janë të pazbatueshme ose në kundërshtim me detyrimet ndërkombëtare të Kosovës. “Në vend të argumenteve juridike, opinioni publik është përballur kryesisht me polemika, interpretime të njëanshme dhe qëndrime politike, të cilat nuk mund të trajtohen si përfundime të pakontestueshme”, thuhet në reagim.
Organizata shpreh dyshimin se pas këtyre reagimeve qëndron një përpjekje e qëllimshme për të dekurajuar qytetarët që, sipas saj, kanë protestuar “natë pas nate e ditë pas dite” me shpresën për drejtësi.
Megjithatë, Veteranët vlerësojnë se mënyra dhe koha e reagimeve të fundit krijojnë një përshtypje të tillë. “Ne, kategoritë e dala nga lufta e UÇK-së, besojmë dhe jemi të bindur se ndryshimet e miratuara përbëjnë një hap të rëndësishëm për ta vendosur Gjykatën Speciale në binarët e duhur të drejtësisë”, thuhet më tej në reagim.
Sipas organizatës, ndryshimet duhet të shihen në funksion të respektimit të standardeve juridike dhe parimeve mbi të cilat duhet të mbështetet çdo institucion i drejtësisë.
Veteranët gjithashtu kritikojnë, siç i quajnë, “spekulimet” mbi pasojat e mundshme juridike, duke theksuar se ato nuk mund ta zëvendësojnë një analizë profesionale. “Kushdo që pretendon të kundërtën, ka përgjegjësinë ta argumentojë qëndrimin e vet me fakte, dispozita konkrete dhe arsyetim juridik, jo me deklarime politike”, thuhet në reagim.
Organizata thekson se Kosova e ka dëshmuar gatishmërinë për të bashkëpunuar me drejtësinë ndërkombëtare, edhe në raste kur, sipas saj, janë marrë vendime jashtëzakonisht të vështira.
Megjithatë, sipas Veteranëve të UÇK-së, bashkëpunimi me drejtësinë ndërkombëtare nuk nënkupton heqje dorë nga e drejta për të kërkuar drejtësi të paanshme, përgjegjshmëri institucionale dhe respekt për dinjitetin e luftës çlirimtare.
Në përfundim, organizata bën thirrje që debati për ndryshimet ligjore të zhvillohet mbi bazën e argumenteve juridike dhe jo të interpretimeve politike. “Shpresa e qytetarëve për drejtësi meriton përgjigje të argumentuara, jo përpjekje për ta relativizuar apo shuar atë”, përfundon reagimi i Organizatës së Veteranëve të Luftës së UÇK-së.
Burimi origjinal i informacionit: zeri .info
