Analisti Agon Maliqi, njohës i zhvillimeve në Kosovë, ka shprehur se reagimet e qytetarëve pas vendimit të Gjykatës Speciale ndaj ish-krerëve të UÇK-së janë të lidhura ngushtë me perceptimin se verdikti ka prekur direkt trashëgiminë e luftës çlirimtare dhe historinë e Kosovës.
Në një intervistë për Radion Evropa e Lirë, Maliqi theksoi se debati pas këtij aktgjykimi duhet të fokusohet te përgjegjësia individuale e atyre që janë dënuar, duke shmangur krijimin e një narrativi që lidh tërë lidershipin e UÇK-së me motive kriminale. “Duhet të pyesim sinqerisht: a janë të dënuarit ata që kanë qenë zbatuesit dhe urdhërdhënësit e veprave dhe se a vendos ky lloj verdikti drejtësi?”, shprehet Maliqi.
Ai vlerëson se aktgjykimi nuk ka sjellë drejtësi as për viktimat dhe as për të dënuarit, pasi përgjegjësia është trajtuar në nivelin komandues pa u individualizuar për secilin rast. “Debati duhet të rifokusohet te përgjegjësia individuale e atyre që i kanë bërë veprat, e jo duke ndërtuar një narrativ të motiveve kriminale të lidershipit të UÇK-së”, shtoi ai.
Më 16 shtator, Gjykata Speciale në Hagë dënoi Hashim Thaçin me 25 vjet burgim, Kadri Veselin me 18 vjet, Rexhep Selimin me 13 vjet dhe Jakup Krasniqin me 25 vjet për krime lufte.
Të katër ish-krerët e UÇK-së u shpallën të pafajshëm për akuzat për krime kundër njerëzimit.
Ky aktgjykim është i shkallës së parë dhe mbrojtja ka paralajmëruar ankesë.
Burimi origjinal i informacionit: zeri .info
