Protestat e studentëve dhe të rinjve në Tiranë vazhdojnë edhe të hënën, duke shënuar ditën e 14-të të tyre.
Pas grumbullimit para Ministrisë së Arsimit, protestuesit janë drejtuar drejt Kryeministrisë, duke kërkuar dorëheqjen e kryeministrit Edi Rama.
Sipas raportimeve nga mediat shqiptare, protestës i janë bashkuar edhe pedagogë dhe qytetarë, ndërsa marshimi në rrugët e kryeqytetit është zhvilluar në një atmosferë paqësore.
Siç raporton RTSH, gjatë grumbullimit para Ministrisë së Arsimit, protestuesit kanë brohoritur “Dorëheqje” dhe “Revolucion”, ndërsa ishte vendosur një kordon policor për të monitoruar situatën.
Sipas ATSH-së, kreu i Sindikatës së Universiteteve, Aleksandër Kovaçi, ka deklaruar se pedagogët do të vazhdojnë t’i mbështesin protestat e studentëve, duke theksuar se bojkoti i mësimit është vullnetar. “Bojkoti është vullnetar dhe nuk besoj se ka studentë mjaftueshëm nëpër salla për të zhvilluar mësim”, është shprehur ai.
Ndërkohë, Top Channel raporton se protestuesit janë ndalur para Kryeministrisë, ku kanë vendosur një pankartë me karikaturën e Edi Ramës dhe Aleksandër Vuçiçit në tryezën e dialogut të vendosur pranë shkallëve të Kryeministrisë.
Më pas, protestuesit e kanë grisur dhe i kanë vënë flakën karikaturës.
Burimi origjinal i informacionit: zeri .info
