Protesta e sotme “Jo në emrin tim” në Prishtinë ka përfunduar pas disa orësh tensioni pranë ndërtesave të Qeverisë dhe Kuvendit të Kosovës.
Pas një periudhe të gjatë, situata ka filluar të qetësohet, ndërsa protestuesit janë nisur drejt largimit nga sheshi “Skënderbeu”.
Gjatë mbrëmjes, protestuesit ishin mbledhur në një numër të madh afër institucioneve, por situata u tensionua pas hedhjes së mjeteve piroteknike dhe ndërhyrjes së Policisë së Kosovës me gaz lotsjellës dhe topin e ujit.
Policia kishte vendosur kordon përpara hyrjeve të Qeverisë dhe Kuvendit, duke shkaktuar përplasje mes protestuesve dhe zyrtarëve policorë.
Në këtë protestë morën pjesë edhe deputetë të PDK-së dhe Aleancës, të cilët shprehën mbështetje për protestuesit.
Sipas Policisë së Kosovës, gjatë protestës janë lënduar gjashtë zyrtarë policorë, ndërsa 11 qytetarë/protestues kanë kërkuar ndihmë mjekësore.
Për më tepër, tre protestues janë shoqëruar në stacionin policor.
Protesta “Jo në emrin tim” pritet të vazhdojë edhe nesër, me kërkesën për miratimin e ndryshimeve në Ligjin për Dhomat e Specializuara të Kosovës.
Burimi origjinal i informacionit: zeri .info
