Profesori dhe gazetari Muhamet Mavraj ka theksuar rëndësinë e protestave të studentëve dhe qytetarëve në momentet kyçe të historisë së Kosovës, të cilat kanë bashkuar njerëzit pavarësisht dallimeve politike e fetare.
Duke u ndalur në protestat e vitit 1997, Mavraj shprehu se ato ishin një pasojë e dështimit të politikës dhe theksoi rolin e rinisë në reagimin ndaj situatave të tilla. “Sa herë që kombi është në rrezik, do të dalim përmbi fe e përmbi parti.
Sepse më të parën parti e kemi shqiptarinë dhe më të parën fe e kemi shqiptarinë.
Në ’97-ën ka qenë pasojë e dështimit të politikës.
Nuk ka qenë mania jonë për të dalë për të protestuar, por për këtë punë është rinia.
Për këtë punë është edhe sot, për këtë punë do të jetë edhe nesër”, deklaroi ai.
Mavraj gjithashtu diskutoi zhvillimet e fundit në Hagë, duke theksuar se qytetarët duhet të qëndrojnë të bashkuar pavarësisht ngjarjeve. “Kam menduar që 30-vjetori do të jetë më fitimprurës se ky.
Por ja që ndodhi ajo që ndodhi atje në Hagë, jemi këtu, çka ka thënë Zoti mirë se ka ardhur e përballojmë edhe këtë.
Por mos u gëzonit shumë ata që janë gëzuar, edhe mos u pikëlloni shumë këta që jeni hidhëruar, sepse jemi këtu”, shtoi ai.
Ai gjithashtu përmendi protestat e vitit 1997 në shtatë qytete të Kosovës, ku një numër i madh qytetarësh u mobilizuan, duke kontribuar në forcimin e arsimit universitar pas luftës. “Nuk ishte vetëm Prishtina.
Shtatë qytetet e Kosovës kanë qenë në këmbë atë ditë, sepse në shtatë qendra kishim degë të Universitetit të Prishtinës dhe vetë Universitetin këtu.
Një milion shqiptarë kemi qenë në këmbë atë ditë dhe miliona të tjerë anë e mbanë trojeve shqiptare e në diasporë.
E këto shtatë qytete, kjo e djeshmja që po e mbrojmë sot, ndërtoi shtatë universitete”, përfundoi Mavraj.
Në protestën e organizuar, Nasim Haradinaj bëri thirrje për bashkim dhe drejtësi, duke theksuar se besimi i qytetarëve është dëmtuar. “Ju 100 deputetët që jeni atje, ju thërrasim për bashkim, bashkim, bashkim”, tha Haradinaj, duke iu drejtuar edhe komunitetit ndërkombëtar. “Ndërkombëtarëve që u besuam, na keni tradhtuar.
Kthejani besimin, se do t’ju bie keq ju dhe neve”, shtoi ai.
Haradinaj gjithashtu shprehu se nuk pranon që krimet e kryera gjatë luftës në Kosovë të paraqiten si raste individuale. “Ndërkombëtarë, nuk mund të na mashtroni se janë raste individuale.
Nuk pranojmë të ofendohen 400 masakra, nuk pranojmë të ofendohen fëmijët tanë, gjaku ynë”, përfundoi ai.
Në protestë, Lavdie Gradica, vajza e mjekut të UÇK-së, foli për angazhimin e babait të saj gjatë luftës dhe kërkoi drejtësi për ata që dhanë jetën për atdheun. “Ne nuk kërkojmë privilegj.
Ne kërkojmë drejtësi.
Në emër të dëshmorëve, për familjet tona dhe për ju që sot prisni drejtësinë në Hagë.
Duam drejtësi për çlirimtarët!
Lavdi të gjithë atyre që dhanë jetën për atdheun!” Mijëra qytetarë morën pjesë në protestën e organizuar në Prishtinë, duke brohoritur “UÇK, UÇK”, duke treguar se zëri i popullit për drejtësi është i fortë dhe i pandalur.
Burimi origjinal i informacionit: zeri .info
