Mauricio Pochettino ka identifikuar një nga objektivat e tij të parë për përforcimin e Manchester Unitedit, me trajnerin argjentinas që synon transferimin e mbrojtësit të Fulhamit, Calvin Bassey, gjatë afatit kalimtar të janarit 2027.
Mbrojtësi nigerian, 26-vjeçar, është shndërruar në një nga emrat që po shqyrtohen nga drejtuesit e klubit anglez, pasi përshtatet me planet taktike të trajnerit të ri në “Old Trafford”.
Sipas raportimeve, Bassey ishte në listën e objektivave të Manchester Unitedit edhe para emërimit të Pochettinos, por tani trajneri argjentinas ka dhënë miratimin e tij për këtë transferim.
Megjithatë, realizimi i marrëveshjes nuk pritet të jetë i lehtë, pasi Fulhami kërkon një shumë të konsiderueshme për ta liruar futbollistin.
Fillimisht, klubi londinez e vlerësonte se një ofertë prej rreth 48 milionë eurosh do të mund të shërbente si pikënisje për negociatat, por pretendimet e fundit flasin për një kërkesë që mund të arrijë deri në 50 milionë funte.
Kjo shumë është dukshëm më e lartë se vlera aktuale e Basseyt në tregun e transferimeve, e cila sipas Transfermarkt vlerësohet në 28 milionë euro.
Deri më tani, Manchester Unitedi nuk ka paraqitur ndonjë ofertë zyrtare, ndërsa interesimi për mbrojtësin ndodhet ende në fazën e vlerësimit të mundësisë së transferimit.
Një prej arsyeve që e bëjnë Basseyn tërheqës për Pochettinon është fleksibiliteti i tij taktik.
Reprezentuesi nigerian luan kryesisht si qendërmbrojtës në krahun e majtë, por mund të aktivizohet edhe në pozitën e mbrojtësit të majtë.
Ai ka qenë titullar në të dhjetë ndeshjet e Fulhamit në këtë sezon të Ligës Premier, duke regjistruar gjithsej 900 minuta lojë, pa arritur të shënojë gol apo të asistojë.
Para se të transferohej në Angli, Bassey ishte pjesë e Rangersit dhe Ajaxit, ku fitoi përvojë edhe në garat evropiane.
Fulhami e transferoi atë në korrik të vitit 2023, duke i ofruar një kontratë katërvjeçare.
Përveç tij, Manchester Unitedi është lidhur edhe me emra të tjerë për repartin defensiv, përfshirë Nathan Collinsin e Brentfordit dhe Antonee Robinsonin, i cili gjithashtu është pjesë e Fulhamit.
Ndërkohë, klubi londinez po përgatitet të mbrojë interesat e tij në këtë situatë.
Kontrata aktuale e Basseyt skadon më 30 qershor 2027, por Fulhami ka në dispozicion një opsion të njëanshëm për ta zgjatur atë deri në vitin 2028.
Për më tepër, drejtuesit e klubit kanë nisur të shqyrtojnë mundësinë e një kontrate të re për mbrojtësin, në mënyrë që të shmangin largimin e tij dhe interesimin e klubeve të tjera.

