Presidentja e Republikës së Kosovës, Justina Shiroka Pula, ka reaguar ndaj aktgjykimit të sotëm të Dhomave të Specializuara në Hagë, që lidhet me akuzat për pengim të administrimit të drejtësisë.
Në reagimin e saj, presidentja theksoi se çdo institucion i Republikës së Kosovës, përfshirë edhe Dhomat e Specializuara, duhet të veprojë në përputhje me juridiksionin e përcaktuar nga Kushtetuta e Kosovës dhe të respektojë të drejtat e garantuara në Kapitullin II, si dhe standardet ndërkombëtare për të drejtat e njeriut, të përfshira në Nenin 22 të Kushtetutës.
Ajo theksoi se çdo proces gjyqësor duhet të zhvillohet në përputhje të plotë me standardet ndërkombëtare të gjykimit të drejtë, duke garantuar të drejtat e të akuzuarve dhe respektimin e procedurave ligjore.
Sipas presidentes, aktgjykimi i sotëm ngre shqetësime në lidhje me respektimin e të drejtave të palëve në proces. “Republika e Kosovës mbetet e përkushtuar ndaj drejtësisë, sundimit të ligjit dhe respektimit të të drejtave dhe lirive themelore të njeriut.
Presim që Dhomat e Specializuara të veprojnë në këtë frymë, si dhe që çdo proces gjyqësor dhe ushtrimi i të drejtës për ankim të zhvillohen në përputhje me standardet ndërkombëtare të gjykimit të drejtë”, tha presidentja.
Në përfundim, ajo theksoi se kontributi i Ushtrisë Çlirimtare të Kosovës në luftën për liri dhe pavarësi, si dhe sakrifica e popullit të Kosovës, janë pjesë e historisë së vendit dhe nuk mund të vihen në pikëpyetje nga proceset gjyqësore.
Kështu thuhet në njoftimin e Presidencës së Kosovës.
Burimi origjinal i informacionit: zeri .info

