Forcat ukrainase kanë rritur ndjeshëm sulmet ndaj infrastrukturës energjetike të Rusisë, duke goditur disa nga rafineritë më të mëdha të naftës në katër ditët e fundit.
Sipas vlerësimeve nga projekti ukrainas i inteligjencës me burime të hapura, Dnipro Osint, deri tani është shënjestruar rreth 16% e kapacitetit të përgjithshëm të përpunimit të naftës në Rusi.
Ndër objektivat e goditur është rafineria në Jarosllavl, e cila është njëra prej pesë rafinerive më të mëdha në vend.
Sulmet kanë shkaktuar dëme në disa njësi përpunimi, përfshirë instalimet për përpunimin primar dhe sekondar të naftës, gjë që mund ta vështirësojë rikthimin e këtyre objekteve në funksion dhe rifillimin e prodhimit.
Vlerësimi më i fundit tregon një rritje të konsiderueshme krahasuar me atë të 1 nëntorit, kur analistët llogaritnin se tri rafineritë e goditura përbënin 10% të kapacitetit përpunues të Rusisë.
