Kompania e dytë manovruese e Batalionit Hungarez të Rezervës Taktike të KFOR-it ka organizuar një stërvitje ajrore në Kosovë, në bashkëpunim me paqeruajtësit zviceranë.
Sipas njoftimit të KFOR-it, qëllimi kryesor i këtij ushtrimi ishte forcimi i bashkëpunimit ndërmjet vendeve që kontribuojnë në misionin e udhëhequr nga NATO, si dhe ofrimi i përvojës praktike për ushtarët hungarezë në operacionet e transportit ajror. “Gjatë stërvitjes, ushtarët hungarezë mësuan dhe praktikuan procedurat për dislokim dhe operim së bashku me helikopterët transportues Super Puma të Forcave Ajrore Zvicerane,” thuhet në njoftim.
KFOR-i ka theksuar rëndësinë e stërvitjeve të përbashkëta ndërkombëtare për mbështetje të paqeruajtësve në detyrat e tyre të përditshme. “Aktivitete të tilla janë thelbësore për mbështetje të paqeruajtësve në detyrat e tyre të përditshme, duke rritur aftësinë e tyre për transport të shpejtë të trupave dhe ridislokim efektiv, si dhe duke siguruar bashkëpunim të pandërprerë me partnerët ndërkombëtarë,” theksohet më tej në njoftimin e KFOR-it.
Burimi origjinal i informacionit: zeri .info
