Lista Studentore, e cila fitoi zgjedhjet në Serbi, ka vendosur të shtyjë përkohësisht krijimin e shumicës parlamentare dhe formimin e qeverisë së re.
Megjithatë, përfaqësuesit e saj kanë theksuar se nuk do të heqin dorë nga kërkesa për ndjekjen urgjente penale të figurave kryesore të pushtetit të ish-presidentit Aleksandar Vuçiq.
Duke folur për situatën paszgjedhore në një intervistë për televizionin kroat HRT, avokati nga Beogradi, Çedomir Stojkoviq, tha se ndjekje të tilla nuk do të ishin të mundshme nëse Serbia do të ishte anëtare e Bashkimit Evropian.
Ai kujtoi se gjatë pushtetit të mëparshëm kishte pasur një ndalim për shkak të akuzave për përmbysjen e rendit kushtetues, pas publikimeve të tij në rrjetet sociale.
Stojkoviq gjithashtu kishte ngritur një kallëzim penal kundër Aleksandar Vuçiqit për rolin e tij të pretenduar në vrasjen e civilëve me pushkë snajper gjatë luftës në Sarajevë, në rastin e njohur si “Safari i Sarajevës”, për të cilin ishte arrestuar.
Sipas Stojkoviqit, kërkesat për ndalimin e pjesëtarëve të regjimit të deritanishëm janë plotësisht të justifikuara, sidomos tani që frika në shoqëri është zbehur.
Ai pretendon se në Serbi po zhvillohet një përpjekje për të fshehur abuzimet financiare dhe shkeljet ligjore që kanë ndodhur për vite me radhë. “Kemi parë vepra të dukshme penale para kamerave, duke filluar nga televizioni Informer, i cili përvetësonte para publike për t’i quajtur qytetarët fundërrina, e deri te policët që rrihnin gra dhe fëmijë në rrugë.
Kemi jetuar nën një tirani që fshihej pas errësirës mediatike”, deklaroi Stojkoviq për HRT-në.
Ai shtoi se pret që shumë zyrtarë të lartë të Partisë Përparimtare Serbe (SNS) të përfundojnë në gjykatë për pasurim të paligjshëm.
Duke folur për të ardhmen politike të ish-presidentit serb, Stojkoviq pretendoi se ndikimi i Vuçiqit është zhdukur në mënyrë të pakthyeshme dhe se ai tashmë është margjinalizuar politikisht.
