Kim Kardashian ka treguar se gjatë një udhëtimi në Afrikë në vitin 2018, një person i kishte drejtuar armën në kokë.
Këto pretendime dalin nga një libër i ri i gazetarit Jonathan Van Meter, titulluar “Citizen Kim: The Woman Who Created the Future”, i cili është publikuar të martën.
Sipas Page Six, autori shkruan se marrëdhënia mes Kim dhe ish-bashkëshortit të saj, Kanye West, kishte filluar të përkeqësohej në mënyrë të pakthyeshme në tetor të atij viti.
Në librin e tij, Van Meter citon Farnaz Farjam, producente ekzekutive e emisionit “Keeping Up with the Kardashians”, e cila ka ndarë se gjatë atij udhëtimi kishte kuptuar sa e rënduar ishte marrëdhënia mes Kim Kardashianit dhe Kanye Westit. “Po xhironin në një vend të izoluar në Ugandë, kur Kanye u bë paranojak dhe i shqetësuar”, shkruan Van Meter.
Sipas rrëfimit të Farjamit, West ka bindur policinë lokale se dikush po përpiqej ta drogonte.
Si rezultat, policët mbërritën me armët e nxjerra dhe, me kërkesën e tij, hynë me forcë në dhomat e të gjithë anëtarëve të ekipit.
Van Meter shton se, në një moment, “njëri prej policëve ia drejtoi armën Kim Kardashianit në kokë”.
Farjam e përshkruan situatën si jashtëzakonisht të tensionuar, duke thënë se ishte detyruar të merrte me qira një avion privat për të larguar ekipin nga vendi.
Sipas librit, ajo e kishte falur Westin për incidentin, pasi ai vuan nga çrregullimi bipolar dhe dyshohet se ndodhej në një fazë maniake në atë periudhë.
Page Six raportoi se kishte kontaktuar përfaqësuesit e Westit për një koment lidhur me këto pretendime, por deri në publikimin e artikullit nuk kishte marrë përgjigje.
Kim Kardashian, 46 vjeçe, dhe Kanye West, 49 vjeç, u martuan në vitin 2014 dhe e finalizuan divorcin në vitin 2022.
Ata kanë katër fëmijë: North, 13 vjeçe, Saint, 10 vjeç, Chicago, tetë vjeçe, dhe Psalm, shtatë vjeç.
Në librin e ri, Kardashian flet hapur edhe për vështirësitë e bashkëprindërimit me ish-bashkëshortin. “Vazhdoj të shqetësohem për të.
Gjatë gjithë ditës.
Ai është babai i fëmijëve të mi dhe gjithmonë do të shqetësohem për të”, i ka thënë ajo autorit. “Është një barrë e rëndë kur ke fëmijë me dikë me të cilin nuk pajtohesh aq mirë.
Fëmijët e mi nuk duhet ta dinë kurrë këtë”, ka shtuar Kardashian.
Ajo ka pranuar se po përpiqet t’i lërë pas “të gjitha gjërat negative që kanë ndodhur”, por njëkohësisht ka vendosur kufij të qartë në marrëdhënien me Westin.
Burimi origjinal i informacionit: telegrafi .com
