Instituti i Kosovës për Drejtësi (IKD) ka kërkuar një hetim të plotë, të pavarur dhe efektiv për vrasjen e Arlinda Zekajt në Vitomiricë të Pejës, si dhe për veprimet dhe mosveprimet e institucioneve që e trajtuan rastin.
IKD-ja vlerëson se informacionet e publikuara, sipas të cilave viktima kishte kërkuar ndihmë nga institucionet dhe ishte trajtuar nga Policia si viktimë e dhunës në familje pak para vrasjes, ngritin dyshime serioze për dështime të mundshme në mbrojtjen e jetës së saj.
Organizata kërkon që të hetohen veprimet e Policisë, Prokurorisë, Gjykatës, Qendrës për Punë Sociale dhe mekanizmave të tjerë përgjegjës, ndërsa për çdo shkelje të konstatuar duhet të merren masa konkrete penale, disiplinore dhe administrative.
IKD-ja u ka bërë thirrje Qeverisë dhe Kuvendit të Kosovës që të ndërmarrin hapa konkretë për procesin e vettingut në sistemin e drejtësisë, duke theksuar se pritja e këtij procesi nuk duhet të pengojë llogaridhënien për rastet konkrete.
Po ashtu, ka kërkuar masa më efektive për mbrojtjen e grave nga dhuna në familje dhe nga Ministria e Drejtësisë një shqyrtim të legjislacionit penal për vrasjet e grave, duke përfshirë mundësinë e njohjes së shprehur të femicidit.
IKD-ja ka shprehur gatishmërinë për t’i ofruar familjes së të ndjerës këshillim dhe përfaqësim juridik falas për të shqyrtuar mundësinë e kërkimit të përgjegjësisë së shtetit për cenimin e mundshëm të së drejtës për jetë.
Burimi origjinal i informacionit: zeri .info
