Dua Lipa Ndryshon Perceptimin për Operën me Stil të Veçantë
Opera, si një formë arti me traditë të gjatë, shpesh herë lidhet me stereotipe rreth kodeve të rrepta të veshjes dhe me diskutime për interesimin gjithnjë e më të vogël të publikut.
Megjithatë, Dua Lipa duket e vendosur ta ndryshojë këtë perceptim, duke treguar se një natë në opera mund të shndërrohet në një mundësi për të eksperimentuar me modën.
Këngëtarja 31-vjeçare beson se një paraqitje në opera është rasti ideal për të veshur një krijim të sapoprezantuar në pasarelat e modës.
Në galanë hapëse të shfaqjes Lincoln in the Bardo, ylli ndërkombëtar tërhoqi vëmendjen në Metropolitan Opera në New York, duke kombinuar stilin e saj modern me preferencën për veshjet që zbulojnë pjesë të trupit.
Ajo kishte zgjedhur një fustan nga koleksioni pranverë 2027 i shtëpisë së modës Ferragamo.
Veshja përbëhej nga një pjesë e sipërme e zezë, pa rripa, e cila zgjerohej në një fund të gjatë prej byrynxhyku të lehtë dhe voluminoz.
Pëlhura transparente ishte zbukuruar me fije të arta, kristale dhe elemente vezulluese në nuancë blu oqeani, të cilat reflektonin dritën teksa këngëtarja ecte.
Një e çarë e lartë, bishti i gjatë dhe mëngët e gjera, që ngjanin me doreza elegante, i jepnin veshjes një pamje dramatike.
Ndërsa këpucët me taka, të zbukuruara me gurë dekorativë, plotësonin paraqitjen luksoze.
Dua ishte një nga emrat e njohur që morën pjesë në këtë mbrëmje gala, përkrah Amy Poehler, Bowen Yang dhe bashkëshortin e saj, Callum Turner.
Por ajo kishte edhe një arsye të veçantë për të pritur me entuziazëm shfaqjen.
Lincoln in the Bardo është një përshtatje skenike e romanit historik të George Saunders, që fitoi çmimin prestigjioz Booker.
Siç e dinë ndjekësit e buletinit të saj kulturor Service95, Dua është prej kohësh një adhuruese e këtij autori.
Në tetor të vitit 2024, ajo e kishte përzgjedhur librin e botuar në 2017 si një nga rekomandimet e saj mujore për lexim.
Më vonë, e kishte intervistuar edhe vetë Saundersin në podcastin e saj, duke vlerësuar mënyrën se si ai e kishte rrëfyer historinë e vendosur gjatë Luftës Civile Amerikane.
Artistja, fituese e çmimit Grammy, është bërë një burim frymëzimi për brezin e ri, jo vetëm për rekomandimet e librave, por edhe për sugjerimet e restoranteve që ia vlen të vizitohen.
Së fundmi, ajo duket se po e zgjeron këtë interesim përmes pjesëmarrjes në shfaqje opere dhe paraqitjeve të menduara me kujdes për këto ngjarje.
Vetëm muajin e kaluar, Dua mori pjesë në natën hapëse të operës La Traviata në Metropolitan Opera, ku u shfaq me një krijim të guximshëm nga koleksioni vjeshtë 2026 i Ashi Studio, i frymëzuar nga maskaradat.
Veshja e saj përfshinte një korse dhe detaje me pupla.
Burimi origjinal i informacionit: telegrafi .com
