Kryeministri i Kosovës, Albin Kurti, priti të premten pasdite kryetarin e Bashkësisë Islame të Kosovës, Myftiun Naim Tërnava.
Në këtë takim u diskutua për zhvillimet politike, bashkëpunimin institucional dhe aktgjykimin e shkallës së parë të Dhomave të Specializuara në Hagë ndaj ish-krerëve të Ushtrisë Çlirimtare të Kosovës (UÇK).
Sipas njoftimit, një nga temat kryesore ishte zgjedhja e presidentes së re, Justina Shiroka Pula, e cila shmangu nevojën për të mbajtur zgjedhjet e katërta parlamentare brenda dy vjetësh, duke mundësuar kështu një kthim te stabiliteti institucional. “Teksa kryeministri Kurti shprehu kënaqësi për takimin, Myftiu Tërnava e uroi për presidenten e re Justina Shiroka Pula, e cila ka kontribuar për shmangien e zgjedhjeve të katërta parlamentare dhe për stabilitetin institucional,” thuhet në njoftim.
Gjatë bisedës, palët folën për bashkëpunimin ndërmjet institucioneve, avancimin e projekteve të përbashkëta, solidaritetin dhe humanitetin qytetar, si dhe vlerat shoqërore e kombëtare.
Në fokus ishin edhe zhvillimet politike në rajon e më gjerë, përfshirë aktgjykimin e shkallës së parë ndaj ish-krerëve të UÇK-së, Hashim Thaçi, Kadri Veseli, Rexhep Selimi dhe Jakup Krasniqi.
Aktgjykimi u cilësua si i padrejtë dhe i pasaktë, dhe u diskutua për hapat që duhen marrë në procesin e ardhshëm të apelit.
Në përfundim të takimit, Kurti shprehu mirënjohje për Bashkësinë Islame të Kosovës për rolin e saj konstruktiv dhe kontributin e saj në shërbim të popullit të Kosovës.
Burimi origjinal i informacionit: zeri .info
