Martha Stewart ka ndarë me ne se merr një buxhet prej 40 mijë dollarësh për veshjet që përdor në shfaqjet e modës.
Ekspertja e stilit të jetesës, e cila është 85 vjeçe, ishte e ftuar në episodin e parë të podcastit “Other People’s Business” të MasterClass, ku diskutoi për ndryshimet në industrinë e modës, sidomos për shkak të ndikimit të influencerëve. “Më intereson jashtëzakonisht shumë se si kanë ndryshuar gjërat”, i tha Stewart CEO-s së MasterClass, David Rogier. “Tani influencerët paguhen ose me para, ose me produkte.” Ajo përshkroi përvojën e saj kur ftohet në një shfaqje mode: “Kur më ftojnë në një shfaqje mode, më japin rroba me vlerë 40 mijë dollarë.” “Janë shumë para – 40 mijë dollarë për të më veshur që të shkoj në një shfaqje mode, thjesht për të qenë aty… Është shumë bukur, më pëlqen kjo punë!”, shtoi Stewart.
Rogier e sqaroi më tej këtë situatë: “Ata të japin rroba me vlerë 40 mijë dollarë, në mënyrë që të zgjedhësh çfarë të duash të veshësh dhe të shkosh me to në shfaqje – dhe rrobat mbeten të tuat.” Në shkurt, Stewart ishte ulur në një nga vendet kryesore në Javën e Modës në Nju Jork, gjatë sfilatës së Carolina Herrera.
Ndërsa muajin e kaluar, ajo u pa në prezantimin e koleksionit pranveror të TWP në Nju Jork.
Gjatë paraqitjes në podcast, Stewart përmendi se ndikimi i influencerëve të sotëm mund të matet edhe përmes fuqisë së tyre financiare dhe të ardhurave.
Në një industri ku prania e personazheve të famshëm dhe influencerëve në rreshtat e parë është bërë gjithnjë e më e rëndësishme, duket se pjesëmarrja në një sfilatë gjithashtu sjell përfitime të konsiderueshme.
Burimi origjinal i informacionit: telegrafi .com
