Dushan Janjiq nga Forumi për Marrëdhënie Etnike në Beograd, në një intervistë për Radion Evropa e Lirë, shprehu se arritja e marrëveshjes politike mes subjekteve politike shqiptare në Serbi është “një hap i mirë politik”, duke theksuar se kjo do të sigurojë numrin maksimal të votave.
Ai vlerëson se “autoriteti” i kryeministrit të Kosovës, Kurti, ka luajtur një rol të rëndësishëm në këtë proces.
Janjiq gjithashtu thekson se, në rast se rezultati mes listës “Serbia e Bashkuar” të Aleksandar Vuçiqit dhe listës studentore “Studentët fitojnë” është i ngushtë, pakica shqiptare do të ketë më shumë fuqi në vendimmarrjen se kë do ta mbështesë.
Sipas tij, “barrën më të madhe” të kësaj marrëveshjeje e kanë bartur partitë që deri më tani kanë bashkëpunuar me autoritetet serbe.
Ai thekson se shqiptarët në Serbi nuk mund të kenë vende të rezervuara në Kuvend, siç kërkon kryeministri Kurti, sepse shqiptarët tashmë kanë Këshillin Kombëtar. “Me përcaktimin e vendeve të garantuara në bazë të numrit të banorëve, shqiptarët nuk do të merrnin më shumë se tri”, ka thënë ai, duke e ilustruar këtë me modelin e vendeve të garantuara për komunitetet e vogla.
Janjiq gjithashtu përmendi se pakica shqiptare komunikon me Kosovën, duke e konsideruar atë shtet amë, ndërsa autoritetet serbe e shohin Shqipërinë si shtet amë të tyre.
Kjo nuk është hera e parë që ndihma nga Kosova ose Shqipëria është e pranishme në arritjen e marrëveshjeve mes partive shqiptare në jug të Serbisë.
Në vitin 2020, përfaqësuesit politikë nga tri komunat në jug të Serbisë nënshkruan një marrëveshje për pjesëmarrje të përbashkët në zgjedhjet e ardhshme parlamentare në Serbi, e cila u nënshkrua në prani të ministrit të atëhershëm për Evropën dhe Punët e Jashtme të Shqipërisë, Gent Cakajt.
Burimi origjinal i informacionit: zeri .info
