Komandanti i Njësisë Speciale Shumëkombëshe (MSU) të KFOR-it, koloneli Gianfranco Di Fiore, ka vizituar pjesëtarët e kësaj njësie që veprojnë në Mitrovicë.
Sipas KFOR-it, gjatë vizitës Di Fiore ka vlerësuar nga afër profesionalizmin, gatishmërinë dhe përkushtimin e pjesëtarëve të MSU-së në përmbushjen e misionit të KFOR-it.
MSU-ja ka rol të rëndësishëm në ruajtjen e pranisë, lëvizshmërisë dhe gatishmërisë së KFOR-it për të reaguar ndaj zhvillimeve të sigurisë në terren.
Pjesëtarët e saj kontribuojnë gjithashtu në rritjen e vetëdijes për situatën dhe në sigurimin e një pranie të dukshme të misionit.
Gjatë vizitës, ai është takuar edhe me pjesëtarët e Ekipit për Ndërlidhje dhe Monitorim (LMT) K2 të KFOR-it, duke vlerësuar angazhimin e tyre në ruajtjen e dialogut me përfaqësuesit e komuniteteve në terren.
KFOR-i ka theksuar se, pavarësisht optimizimit të strukturës së pranisë së tij, përgjegjësia e misionit mbetet e njëjtë.
Sipas KFOR-it, misioni vazhdon të koordinohet ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), në përputhje me rolet e tyre përkatëse si reagues të sigurisë.
Burimi origjinal i informacionit: zeri .info
