Diaspora shqiptare në Shtetet e Bashkuara është mbledhur në Times Square të Nju-Jorkut në mbështetje të ish-krerëve të UÇK-së, pas shpalljes së aktgjykimit të shkallës së parë nga Dhomat e Specializuara në Hagë.
Pamje nga tubimi ka publikuar në Facebook prefekti i Qarkut të Tiranës, Shkëlqim Hajdari, i cili tha se diaspora shqiptare është bashkuar me kërkesën për liri për ish-krerët e UÇK-së. ‘Të gjithë bashkë, për një qëllim — liri për çlirimtarët!’, shkroi Hajdari.
Sipas tij, shqiptarët në diasporë u mblodhën ‘si një trup i vetëm’, për të qëndruar pranë Hashim Thaçit, Kadri Veselit, Jakup Krasniqit dhe Rexhep Selimit, të cilët Hajdari tha se beson se janë dënuar padrejtësisht. ‘Pavarësisht se nga cila trevë shqiptare vijmë, sot na bashkon Kosova, na bashkon historia jonë dhe respekti për ata që luftuan dhe sakrifikuan për lirinë e saj’, shkroi ai.
Hajdari tha se mesazhi i diasporës nga Amerika dhe vende të tjera është se nuk do t’i harrojë ish-krerët e UÇK-së dhe sakrificën e popullit të Kosovës. ‘Së bashku kemi qenë në ditët më të vështira dhe së bashku do të vazhdojmë të qëndrojmë edhe sot — si vëllezër e motra, si një diasporë dhe si një komb’, tha Hajdari.
Tubimi në Times Square u zhvillua një ditë pasi Dhomat e Specializuara shpallën aktgjykimin e shkallës së parë ndaj Thaçit, Veselit, Selimit dhe Krasniqit.
Thaçi dhe Krasniqi u dënuan me nga 25 vjet burgim, Veseli me 18 vjet dhe Selimi me 13 vjet.
Të katër u shpallën të pafajshëm për akuzat për krime kundër njerëzimit, ndërsa u shpallën fajtorë për disa akuza për krime lufte. ‘Liri, drejtësi, dinjitet.
Së bashku për vëllezërit tanë.
Së bashku për çlirimtarët’, përfundoi Hajdari.
Burimi origjinal i informacionit: zeri .info
