Një dizajnere e re nga New Yorku ka nisur një betejë ligjore ndaj markës së modës ‘Skims’ të Kim Kardashian, e cila vlerësohet se ka vlerë rreth pesë miliardë dollarë (4.26 miliardë euro).
Ajo pretendon se ‘Skims’ i ka marrë emrin e biznesit dhe e ka shndërruar atë në një linjë produktesh që sot, sipas padisë, gjeneron qindra miliona të ardhura.
Në padi thuhet se ‘Skims’ e ka lansuar koleksionin ‘Fits Everybody’ pavarësisht paralajmërimeve të përsëritura nga marka më pak e njohur ‘Fits Everybody To A T’.
Sipas dokumenteve të paraqitura në Gjykatën Federale për Distriktin Jugor të New Yorkut, ‘Skims’ e lansoi linjën e kontestuar pasi kishte marrë ‘paralajmërime të përsëritura dhe të qarta’ për të drejtat e markës më të vogël, dhe më pas e zhvilloi atë në një nga koleksionet më të suksesshme të kompanisë.
Pronarja e biznesit të vogël, Denise Cesare, deklaron se e ka ndërtuar markën e saj vite para se të shfaqej ‘Skims’, por më pas u ‘hijëzua dhe u shty mënjanë’.
