Prokuroria për Krime Lufte e Serbisë ka njoftuar se janë duke u përcaktuar faktet dhe duke u ndërmarrë veprime provuese lidhur me arrestimin e M.M., i dyshuar për veprën penale të krimit të luftës kundër popullsisë civile në Kosovë në vitin 1999.
M.M. u arrestua në pikën kufitare Horgosh, ndërmjet Serbisë dhe Hungarisë, tha më 2 gusht Ministria e Punëve të Brendshme të Serbisë.
Autoritetet serbe nuk kanë bërë publik emrin dhe shtetësinë e personit të arrestuar.
Avokati nga Kosova, Arianit Koci, ka konfirmuar se shtetasi i ndaluar është Mentor Mustafa (44) nga fshati Jasenovik i komunës së Novobërdës.
Mustafa u ndalua rreth orës 22:30 të 1 gushtit në pikëkalimin kufitar ndërmjet Hungarisë dhe Serbisë.
Në Kosovë, po ashtu, viteve të fundit janë arrestuar dhjetëra serbë nën dyshime për krime lufte në Kosovë dhe disa raste kanë përfunduar me aktgjykime dënuese.
Burimi origjinal i informacionit: zeri .info
