Albulena Haxhiu, kryetare e Kuvendit dhe aktualisht ushtruese e detyrës së Presidentit, në një intervistë për RTV Dukagjini, ka theksuar se duhet të përqendrohemi në përgatitjen për akuzat që mund të bien për ndërmarrje të përbashkët kriminale ndaj ish-krerëve të UÇK-së. “Sepse kjo në thelb prek UÇK-në”, theksoi ajo.
Ajo vazhdoi duke shprehur se pas këtij vendimi të gjykatës, “është shumë e rëndësishme të ketë një strategji shtetërore”.
Duke komentuar vendimin e shkallës së parë të Gjykatës Speciale, Haxhiu e quajti atë të padrejtë dhe një barrë të rëndë për Kosovën, sidomos për familjet dhe fëmijët që janë rritur gjatë kësaj periudhe. “UÇK-ja është formuar për shkak të shtypjes, represionit, dhunës, vrasjeve, dëbimeve dhe helmimeve që kanë ndodhur para luftës.
Shumë prej nesh kemi qenë në moshë të re, por jo aq të re sa të mos e mbajmë mend periudhën e vështirë nëpër të cilën kemi kaluar”, shprehu ajo.
Haxhiu theksoi se ky vendim e prek edhe personalisht, duke përmendur se babai, bashkëshorti dhe familjarë të bashkëshortit të saj kanë qenë pjesë e UÇK-së. “E vlerësoj si një vendim të padrejtë, si një vendim shumë të rëndë për Republikën e Kosovës. Çështja e ndërmarrjes së përbashkët kriminale vazhdon të mbetet shqetësim serioz.
Ne nuk e dimë cili do të jetë qëndrimi i Prokurorisë së Specializuar lidhur me akuzat që kanë rënë.
Prandaj, është shumë e rëndësishme të përgatitemi që të bjerë edhe akuza për ndërmarrje të përbashkët kriminale”, përfundoi Haxhiu.
Burimi origjinal i informacionit: zeri .info
