Kryeshefja ekzekutive e Agjencisë për Barazi Gjinore (ABGJ), Edi Gusia, gjatë raportimit në Komisionin për të Drejtat e Njeriut, Barazi Gjinore dhe Peticione, ka diskutuar mbi kompetencat e institucionit në trajtimin e rasteve të dhunës në familje, masat ligjore për mbrojtjen e grave dhe përgjegjësitë e institucioneve, sidomos pas tragjedisë së vrasjes së Arlinda Zekajt.
Ajo theksoi se mekanizmat koordinues në nivel lokal nuk po funksionojnë siç duhet dhe se takimet e tyre janë pothuajse inekzistente.
Duke folur para anëtarëve të komisionit, Gusia sqaroi se ABGJ nuk ka mandat ligjor për të trajtuar drejtpërdrejt rastet individuale të dhunës në familje apo të diskriminimit, duke theksuar ndarjen e përgjegjësive institucionale sipas ligjit. “Unë do të ndajë këtu me ju, për atë sot ju keni nevojë të merrni opinionin e agjencisë në lidhje me këtë çështje, edhe pse ne duhet ta sqarojmë, Agjencia për Barazi Gjinore, në bazë të Ligjit për Barazi Gjinore, nuk ka mandat t’i trajtojë rastet, qoftë të dhunës në familje apo rastet e diskriminimit.
Domethënë, korniza ligjore e Republikës së Kosovës i ka mandatet shumë të qarta sa i përket barazisë gjinore.” Kryeshefja ekzekutive theksoi punën e institucionit në hartimin e kornizës ligjore për mbrojtjen nga dhuna në familje, duke theksuar se agjencia ka hartuar ligjin e parë për këtë çështje në vitin 2010 dhe procedurat standarde të veprimit për trajtimin e rasteve. “Sa i përket angazhimit të Agjencisë për Barazi Gjinore në përgjithësi në hartimin e kornizës ligjore, vlen të theksohet se agjencia ka hartuar ligjin e parë për mbrojtjen nga dhuna në familje në vitin 2010, kur, të themi, ndoshta asnjë nga shtetet e Ballkanit Perëndimor nuk kishte ligj për mbrojtjen nga dhuna në familje.” Ajo përmendi gjithashtu propozimin e ABGJ-së për krijimin e mekanizmit të koordinatorit nacional për forcimin e koordinimit institucional në trajtimin e çështjeve që lidhen me barazinë gjinore dhe dhunën ndaj grave. “Vlen të theksohet se në vitin 2013 ishte pikërisht Agjencia për Barazi Gjinore që i propozoi Qeverisë themelimin e një mekanizmi si koordinatorja ose koordinatori nacional.” Duke folur për bashkëpunimin ndërinstitucional, Gusia theksoi se ABGJ ka punuar ngushtë me Ministrinë e Drejtësisë për rishikimin e legjislacionit për mbrojtjen nga dhuna në familje. “Ashtu siç e cekët, ne kemi bashkëpunuar shumë ngushtë me Ministrinë e Drejtësisë në rishikimin e Ligjit për Mbrojtjen nga Dhuna në Familje.” Ajo gjithashtu foli për trajnimin e Policisë së Kosovës në trajtimin e rasteve të dhunës, duke theksuar se agjencia ka trajnuar rreth 11 mijë e 300 policë që nga hyrja në fuqi e procedurave standarde në vitin 2013.
Megjithatë, ajo theksoi se kapacitetet e kufizuara njerëzore të agjencisë e vështirësojnë zgjerimin e këtyre trajnimeve. “Divizioni për Legjislacion në agjenci, që ju udhëheq këto trajnime, ka një staf minimal prej vetëm tre personash, i cili ndër vite nuk është rritur.” Gusia vuri në pah edhe përgjegjësitë e komunave për funksionimin e mekanizmave koordinues, të cilët duhet të mbledhin institucionet përgjegjëse për të diskutuar rastet e dhunës ndaj grave. “Në anën tjetër, kemi trajnuar edhe mekanizmat koordinues në nivel lokal, sepse të gjitha komunat e Republikës së Kosovës kanë përgjegjësi të themelojnë mekanizmin koordinues.” Ajo diskutoi për financimin e strehimoreve për viktimat e dhunës, duke theksuar se Ministria e Punës dhe Mirëqenies Sociale ka ndarë 1.5 milion euro për dhjetë strehimoret në Kosovë, ndërsa komunat gjithashtu kanë obligim të kontribuojnë për financimin e tyre. “Kjo është një pyetje që ndoshta është dashur të zgjidhet nëpërmjet Ministrisë së Pushtetit Lokal dhe të shihet cilat janë ato komuna të cilat nuk i financojnë strehimoret.” Burimi origjinal i informacionit: zeri .info
