Kryeshefja ekzekutive e Agjencisë për Barazi Gjinore (ABGJ), Edi Gusia, gjatë raportimit në Komisionin për të Drejtat e Njeriut, Barazi Gjinore dhe Peticione, ka diskutuar mbi kompetencat e institucionit në trajtimin e rasteve të dhunës në familje, masat ligjore për mbrojtjen e grave dhe përgjegjësitë institucionale, sidomos pas vrasjes së Arlinda Zekajt.
Ajo theksoi se mekanizmat koordinues në nivel lokal nuk po funksionojnë siç duhet dhe se takimet e tyre janë pothuajse inekzistente.
Duke folur para anëtarëve të komisionit, Gusia sqaroi se institucionet që ajo drejton nuk kanë mandat ligjor për të trajtuar drejtpërdrejt rastet individuale të dhunës në familje apo diskriminimit, duke theksuar se përgjegjësitë institucionale janë të ndara me ligj. “Unë do të ndajë këtu me ju, për atë sot ju keni nevojë të merrni opinionin e agjencisë në lidhje me këtë çështje, edhe pse ne duhet ta sqarojmë, Agjencia për Barazi Gjinore, në bazë të Ligjit për Barazi Gjinore, nuk ka mandat t’i trajtojë rastet, qoftë të dhunës në familje apo rastet e diskriminimit.
Domethënë, korniza ligjore e Republikës së Kosovës i ka mandatet shumë të qarta sa i përket barazisë gjinore.” Gusia përmendi punën e institucionit në hartimin e kornizës ligjore për mbrojtjen nga dhuna në familje, duke potencuar se agjencia ka hartuar ligjin e parë për këtë çështje në vitin 2010, si dhe procedurat standarde të veprimit për trajtimin e rasteve. “Sa i përket angazhimit të Agjencisë për Barazi Gjinore në përgjithësi, vlen të theksohet se agjencia ka hartuar ligjin e parë për mbrojtjen nga dhuna në familje në vitin 2010, kur, të themi, ndoshta asnjë nga shtetet e Ballkanit Perëndimor nuk kishte ligj për mbrojtjen nga dhuna në familje.” Ajo rikujtoi se në vitin 2013, ABGJ-ja kishte propozuar Qeverisë themelimin e mekanizmit të koordinatorit nacional, për të forcuar koordinimin institucional për trajtimin e çështjeve që lidhen me barazinë gjinore dhe dhunën ndaj grave. “Vlen të theksohet se në vitin 2013 ishte pikërisht Agjencia për Barazi Gjinore që i propozoi Qeverisë themelimin e një mekanizmi si koordinatorja ose koordinatori nacional.” Duke folur për bashkëpunimin ndërinstitucional, Gusia tha se ABGJ-ja ka punuar ngushtë me Ministrinë e Drejtësisë në rishikimin e legjislacionit për mbrojtjen nga dhuna në familje, dhuna ndaj grave dhe dhuna me bazë gjinore. “Ashtu siç e cekët, ne kemi bashkëpunuar shumë ngushtë me Ministrinë e Drejtësisë në rishikimin e Ligjit për Mbrojtjen nga Dhuna në Familje.” Ajo gjithashtu foli për trajnimet e Policisë së Kosovës për trajtimin e rasteve të dhunës në familje, duke theksuar se agjencia ka trajnuar rreth 11 mijë e 300 policë që nga hyrja në fuqi e procedurave standarde të veprimit në vitin 2013.
Megjithatë, ajo e theksoi se kapacitetet e kufizuara njerëzore të agjencisë e vështirësojnë zgjerimin e këtyre trajnimeve. “Dhe nëse i shohim, nga hyrja në fuqi e procedurave standarde të veprimit në vitin 2013, Agjencia për Barazi Gjinore ka trajnuar diku rreth 11 mijë e 300 policë të Republikës së Kosovës.
Ky nuk është numër i mjaftueshëm.” Ajo theksoi edhe përgjegjësitë e komunave për funksionimin e mekanizmave koordinues, të cilët duhet të mbledhin institucionet përgjegjëse për të diskutuar rastet e dhunës ndaj grave. “Po ndalem veç pak për ta sjellë vëmendjen tuaj se pse është i rëndësishëm ky mekanizëm koordinues.” Gusia foli gjithashtu për financimin e strehimoreve për viktimat e dhunës, duke theksuar se Ministria e Punës dhe Mirëqenies Sociale ka ndarë 1.5 milion euro për dhjetë strehimoret në Kosovë, duke e bërë të qartë se komunat kanë obligim të kontribuojnë në financimin e tyre. “Ministria e Punës dhe Mirëqenies Sociale ka disbursuar 1.5 milion euro për dhjetë strehimoret e Republikës së Kosovës.” Burimi origjinal i informacionit: zeri .info
