Fenerbahce ka reaguar me forcë pas incidenteve të raportuara gjatë derbit ndaj Galatasarayt, duke kërkuar një hetim të plotë dhe ndëshkim për të gjithë ata që ishin të përfshirë në sulmet e pretenduara ndaj futbollistëve të saj.
Në një komunikatë zyrtare, klubi nga Stambolli thekson se situata u tensionua fillimisht pas fyerjeve të drejtuara ndaj Kerem Akturkoglut, përpara se incidentet të përshkallëzoheshin në përplasje fizike.
Sipas versionit të Fenerbahçes, Matteo Guendouzi është sulmuar nga Serhat Dogan, një anëtar i ekipit të analizës së Galatasarayt.
Klubi po ashtu pretendon se në incident ishte i përfshirë edhe Abdulkerim Bardakci, i cili dyshohet se ia ka tërhequr flokët futbollistit të Fenerbahçes.
Drejtuesit e klubit e kanë dënuar ashpër atë që e konsiderojnë sjellje të papranueshme, duke theksuar se tensioni që shoqëron një derbi nuk mund të përdoret si justifikim për sulmet ndaj futbollistëve. “Rivaliteti dhe tensioni i një derbi nuk i japin askujt të drejtën të sulmojë futbollistët tanë.
Ajo që ndodhi nuk mund të justifikohet me ‘tensionin e derbit’”, theksohet në komunikatën e Fenerbahces.
Klubi kërkon që të gjitha incidentet të shqyrtohen në mënyrë të plotë dhe që personat përgjegjës të përballen me masa disiplinore, pavarësisht pozitës apo rolit të tyre. “Rruga për ta parandaluar dhunën në futbollin turk është që përgjegjësit të mos mbeten pa u ndëshkuar”, përfundon reagimi.
