Kryeprokurori i Shtetit, Zejnulla Gashi, ka marrë vendim për ricaktimin e tri lëndëve penale që lidhen me rastin e Arlinda Zekaj-Sylajt, duke i transferuar ato nga Prokuroria Themelore në Pejë në Prokurorinë Themelore në Prishtinë.
Sipas njoftimit nga Zyra e Kryeprokurorit të Shtetit, ky vendim ka si qëllim sigurimin e një trajtimi efikas, objektiv dhe të paanshëm të këtyre lëndëve, duke pasur parasysh rëndësinë e rastit dhe pasojat e rënda që ai ka sjellë. “Vendimet janë marrë në mbështetje të Nenit 20, paragrafi 2, të Ligjit për Prokurorin e Shtetit, duke marrë parasysh rëndësinë e veçantë të këtyre çështjeve, pasojat e rënda që kanë rezultuar, si dhe nevojën për të siguruar trajtimin e mëtejmë efikas, objektiv dhe të paanshëm të lëndëve.
Ricaktimi i këtyre lëndëve synon të sigurojë që ato të trajtohen me kujdesin, vëmendjen dhe seriozitetin e duhur, në përputhje me ligjin dhe me rëndësinë e rrethanave të secilit rast.” Në të njëjtën kohë, Zyra e Kryeprokurorit të Shtetit po analizon veprimet dhe mosveprimet e mundshme institucionale që lidhen me rastet e raportuara nga e ndjera, përfshirë vlerësimin e rrezikut dhe masat e ndërmarra për mbrojtjen e saj. “Paralelisht me ricaktimin e lëndëve, Zyra e Kryeprokurorit të Shtetit është duke analizuar në mënyrë të gjithanshme të gjitha veprimet dhe mosveprimet eventuale institucionale lidhur me trajtimin e rasteve të raportuara nga e ndjera.
Ky proces përfshin shqyrtimin e kronologjisë së veprimeve të ndërmarra, vendimeve të nxjerra, vlerësimit të rrezikut dhe masave të ndërmarra për mbrojtjen e saj, si dhe të çdo rrethane tjetër relevante për përcaktimin e përgjegjësive eventuale.
Zyra e Kryeprokurorit të Shtetit do të kërkojë llogaridhënie të plotë për çdo shkelje të ligjit, neglizhencë apo mosveprim që mund të konstatohet.
Në rast se evidentohen shkelje ose përgjegjësi, do të ndërmerren masa rigoroze dhe do të kërkohet përgjegjësi për secilin zyrtar, në përputhje me ligjin dhe kompetencat përkatëse.” Nga Zyra e Kryeprokurorit është njoftuar se, nëse konstatohen shkelje ose përgjegjësi, do të kërkohet llogaridhënie dhe do të ndërmerren masa në përputhje me ligjin. “Kryeprokurori i Shtetit rithekson se mbrojtja e jetës, zbatimi i ligjit dhe llogaridhënia institucionale janë detyrime që nuk mund të neglizhohen.
Institucionet e drejtësisë kanë përgjegjësi të veçantë që çdo raportim të trajtohet me seriozitetin dhe urgjencën e nevojshme dhe që çdo dyshim për mosveprim ose trajtim të papërshtatshëm të shqyrtohet deri në sqarimin e plotë të rrethanave.” Burimi origjinal i informacionit: zeri .info
