Deputeti i Aleancës, Besnik Tahiri, ka kërkuar dorëheqje dhe shkarkime pas vrasjes tragjike të Arlinda Zekajt, duke e quajtur këtë një veprim etik dhe një përgjegjësi që kanë institucionet për një ngjarje që ka tronditur thellësisht qytetarët e Kosovës.
Nga foltorja e Parlamentit, Tahiri ka theksuar se vrasja e Arlindës nuk është një rast i izoluar, por një pjesë e një fenomeni shqetësues që kërkon reflektim dhe llogaridhënie nga institucionet. “Pa asnjë dyshim, vrasja e Arlindës është një tragjedi që na ka tronditur të gjithëve, por nuk është rast i veçuar.
Fatkeqësisht, është duke u bërë një fenomen i cili në Kosovë na obligon të reflektojmë dhe, mbi të gjitha, të kërkojmë përgjegjësi”, ka deklaruar ai.
Ai ka theksuar se shprehja e ngushëllimeve dhe dënimi publik i rastit nuk janë të mjaftueshme, duke kërkuar veprime konkrete nga institucionet përgjegjëse. “Sot do të duhej të kishte dorëheqje, shkarkim, si veprim etik ndaj një ngjarjeje e cila u shkaktoi dhimbje të gjithë qytetarëve të Kosovës”, ka thënë Tahiri.
Deputeti i Aleancës ka theksuar se dhuna ndaj grave nuk duhet të trajtohet si një rast i izoluar, apo vetëm nga këndvështrimi i femicidit, por gjithashtu në raport me përgjegjësinë institucionale.
Burimi origjinal i informacionit: zeri .info
