Dhoma e Specializuar e Gjykatës Kushtetuese në Hagë ka marrë një vendim në lidhje me kërkesën referuese të Pjetër Shalës, duke shpallur disa nga ankesat e tij të papranueshme, ndërsa për pjesën tjetër ka konstatuar se nuk ka pasur shkelje të të drejtave të garantuara nga Kushtetuta e Kosovës dhe konventat ndërkombëtare.
Sipas njoftimit të Dhomave të Specializuara të Kosovës, aktgjykimi është lëshuar më 23 tetor 2026 dhe është bërë publik më 26 tetor.
Shala kishte pretenduar se gjatë procesit penal ishin shkelur të drejtat e tij individuale, duke përfshirë të drejtën për një gjykim të drejtë, parimin e ligjshmërisë dhe të drejtën për t’u informuar në mënyrë efektive për akuzat.
Një nga pretendimet e tij lidhej me kohën e kaluar ndërmjet krimeve të përfshira në aktakuzë dhe gjykimit të tij, për të cilën Dhoma konstatoi se ai kishte përfituar nga një proces gjyqësor ballafaques.
Ajo vlerësoi se “procesi, si i tërë, kishte qenë i drejtë dhe joarbitrar”.
Shala gjithashtu kishte kundërshtuar pranimin dhe përdorimin e deklaratave të dhëna më parë para Tribunalit Penal për ish-Jugosllavinë dhe Policisë Gjyqësore Federale të Belgjikës, kur ishte marrë në pyetje si i dyshuar pa përfaqësues ligjor.
Dhoma vuri në dukje se Shalës i ishin dhënë mundësi të shumta për t’i kundërshtuar këto deklarata, dhe se kundërshtimet ishin trajtuar nga panelet penale.
Ajo theksoi se njëra nga deklaratat nuk ishte përdorur në gjykim, ndërsa të tjerat nuk kishin qenë vendimtare për shpalljen e tij fajtor.
Shala gjithashtu kishte pretenduar se ndërmarrja kriminale e përbashkët dhe krimi i luftës i ndalimit arbitrar nuk ishin të përcaktuara mjaftueshëm me ligj në atë kohë.
Megjithatë, Dhoma e Specializuar e Gjykatës Kushtetuese konstatoi se këto forma të përgjegjësisë kishin bazë në të drejtën zakonore ndërkombëtare.
Sipas njoftimit, burimet ligjore përkatëse ishin të disponueshme shumë kohë para kryerjes së krimeve dhe ishte e parashikueshme që Shala mund të mbahej penalisht përgjegjës.
Gjykata shqyrtoi gjithashtu pretendimet e Shalës për mungesë hollësish në aktakuzë lidhur me anëtarët e ndërmarrjes kriminale dhe identitetin e viktimave, duke konstatuar se informacioni i dhënë i kishte mundësuar atij të kuptonte akuzat dhe të përgatiste mbrojtjen.
Ai kishte kundërshtuar gjithashtu bazën ligjore të shkallëzimit të dënimit, duke pretenduar se dënimi ishte i tepruar në krahasim me raste të ngjashme.
Për këtë pretendim, Dhoma shpalli ankesën të papranueshme për shkak të mosshterimit të mjeteve juridike.
Sa i përket zbatimit të ligjit mbi dënimet, ajo rikujtoi se Dhomat e Specializuara funksionojnë bazuar në kornizën e tyre ligjore, duke përcaktuar rregullat për shqiptimin e dënimeve.
Aktgjykimi i plotë është publikuar në faqen zyrtare të Dhomave të Specializuara të Kosovës në Hagë.
Burimi origjinal i informacionit: zeri .info
