Kryeprokurori i Shtetit, Zejnulla Gashi, ka marrë masa konkrete për të zbardhur dhe analizuar të gjithë historikun e trajtimit të rasteve që lidhen me Arlinda Zekaj, e cila humbi jetën më 25 tetor 2026 në Pejë.
Përmes një njoftimi për media, është bërë e ditur se koordinatori nacional për rastet e dhunës në familje është autorizuar të analizojë në detaje çdo veprim institucional që është marrë deri tani, ku viktimë ishte e ndjera.
Në kuadër të këtyre masave, kryeprokurorja e Prokurorisë Themelore në Pejë, Lumturije Vuçetaj, ka kërkuar një raport të detajuar me shkrim mbi kronologjinë e plotë të rasteve.
Ky raport do të përfshijë identitetin e personave të denoncuar, kualifikimin juridik të veprave, emrat e prokurorëve kujdestarë dhe atyre që kanë pasur në dorë lëndët, si dhe veprimet procedurale dhe afatet e ndërmarra, vendimet e marra dhe arsyetimet përkatëse ligjore, shkallën e vlerësimit të rrezikut dhe masat mbrojtëse që janë kërkuar për viktimën.
Gjithashtu, do të përfshihet bashkërendimi me Policinë e Kosovës dhe institucionet përkatëse, si dhe trajtimi i veçantë i ankesa së viktimës të dorëzuar më 22.10.2026.
Paralelisht, kryeprokurori i Shtetit ka kërkuar nga Inspektorati Policor i Kosovës (IPK) të nisë hetime dhe verifikime ndaj zyrtarëve policorë, për të shqyrtuar mënyrën se si janë pranuar, evidentuar dhe trajtuar denoncimet e Arlinda Zekajt në stacionet policore, me qëllim identifikimin e përgjegjësisë individuale dhe institucionale.
Nga Zyra e Kryeprokurorit të Shtetit theksojnë se lënda po trajtohet me urgjencë dhe paanshmëri maksimale. “Në rast se konstatohen shkelje të ligjit, neglizhencë apo mosveprime nga ana e zyrtarëve përgjegjës, do të ndërmerren masat përkatëse ligjore dhe do të kërkohet përgjegjësi për secilën shkelje të evidentuar, pa asnjë tolerim ndaj përgjegjësisë institucionale ose individuale,” thuhet në njoftim.
Burimi origjinal i informacionit: zeri .info
