Kryeministri i Shqipërisë, Edi Rama, ka reaguar nga një biznes i vogël në Tiranë pas akteve të dhunës gjatë protestës, duke shprehur mbështetje për subjektet e dëmtuara.
Ai njoftoi se nga dita e sotme, bizneset e vogla do të kenë mundësi të regjistrojnë dëmet e pësuara përmes një dritareje të posaçme në portalin e-Albania.
Rama gjithashtu bëri të ditur se 10 grupe të administratës tatimore do të jenë në terren për të mbledhur të dhëna mbi dëmet e shkaktuara në bizneset e vogla të kryeqytetit. “Prej ditës së sotme çdo biznes i vogël që është dëmtuar nga e dhunës qorre ka një dritare në portalin e-Albania ku do të mund të regjistrojë dëmin.
Ndërkohë, 10 grupe tatimore do të jenë në terren për të mbledhur të dhënat e dëmeve mbi biznesin e vogël të kryeqytetit.
Do të jemi bashkë me çdo familje që jeton me punë të ndershme në Tiranë dhe që ka humbur pasurinë, dhe do t’i kthejmë këto gërmadha verbërie në shëmbëlltyra të forcës sonë për të ecur përpara,” tha Rama.
Gjatë deklaratës së tij, ai u ndal edhe te e drejta e qytetarëve për të protestuar, duke theksuar se zëri i studentëve, të rinjve dhe çdo qytetari duhet të dëgjohet me respekt. “Ne i respektojmë studentët, e çmoj forcën e ëndrrave dhe shpresave të tyre si motorin e të ardhmes, si shtysën e të gjithëve ne për të ecur përpara.
Zëri i tyre, i të rinjve dhe çdo qytetari sot ka nevojë të protestoj dhe duhet e do të dëgjohet me respekt.
E drejta e tyre për të protestuar duhet dhe do të mbrohet si një e drejtë për të cilën ne kemi luftuar në kohë të ndryshme.
S’do të lejoj askënd dhe asgjë të rrezikojë të ardhmen e këtij vendi,” tha ai.
Rama theksoi se nuk do të lejojë që e ardhmja e të rinjve dhe e fëmijëve të Shqipërisë të rrezikohet për interesa politike apo qëllime të tjera. “Pikërisht sepse të rinjtë janë e ardhmja jonë, unë nuk do të lejoj askënd ta rrezikojë të ardhmen e këtij vendi, ku rriten ata dhe çdo fëmijë i Shqipërisë, as për përfitime politike të atyre duarve të paudhë që janë rikthyer me turbimin e djegies e të shkatërrimit, as për qëllime të prapambetura dhe duar të huaja që janë futur për të na ndalur, por as për ndonjë qëllim tjetër,” u shpreh kryeministri.
Në përfundim, Rama theksoi se përgjegjësia e tij është të mbrojë qytetarët, të garantojë drejtësinë dhe të vijojë rrugën drejt integrimit europian. “Përgjegjësia ime është më e qartë në këto orë të vështira sesa në çdo ditë të mirë: të mbroj qytetarët tanë, të garantoj drejtësinë dhe ta çoj Shqipërinë përpara, së bashku me këtë shumicë qeverisëse që ka një mandat shumë të qartë, Shqipërinë 2030 në Bashkimin Europian,” deklaroi Rama.
Burimi origjinal i informacionit: zeri .info
