Deputetja e LDK-së, Hykmete Bajrami, ka shprehur kritika ndaj Qeverisë për trajtimin e pabarabartë të punëtorëve në sektorin publik dhe atyre në sektorin privat.
Ajo ka ngritur shqetësimin për grevën e punëtorëve teknikë të shkollave.
Në një reagim të saj në Facebook, Bajrami theksoi se punëtorët teknikë të shkollave po protestojnë për një të drejtë elementare, atë të pagës minimale, duke theksuar se kompanitë private të kontraktuara nga komunat vazhdojnë t’i paguajnë ata me vetëm 390 euro në muaj.
Ajo e bëri të qartë se paga minimale prej 500 eurosh bruto ka hyrë në fuqi më 1 korrik 2026 dhe kërkoi nga Inspektorati Qendror i Punës që të ndërmarrë masa ndaj kompanive që nuk e zbatojnë këtë vendim. “Paga minimale nuk është privilegj as opsion, është detyrim ligjor dhe duhet të zbatohet nga të gjithë”, shkroi Bajrami.
Sipas saj, kompanitë që përballen me vështirësi për të mbuluar kostot shtesë duhet të kërkojnë zgjidhje përmes rishikimit të kontratave me komunat, pa i bartur pasojat te punëtorët.
Bajrami kritikoi gjithashtu ndarjen e rreth 130 milionë eurove për pagën e 13-të për punonjësit e sektorit publik, duke theksuar se, në të njëjtën kohë, punëtorët që kujdesen për pastërtinë e shkollave nuk po marrin as pagën minimale.
Ajo u bëri thirrje institucioneve që të sigurojnë zbatimin e vendimit për pagën minimale, komunave që të marrin përgjegjësi për kontratat e tyre dhe kompanive private që t’i respektojnë të drejtat e punëtorëve.
Burimi origjinal i informacionit: zeri .info
