Ndryshimet në Ligjin për Dhomat e Specializuara të Kosovës tani presin vendimin e presidentes Justina Shiroka-Pula, e cila ka 8 ditë kohë për ta dekretuar ose kthyer ligjin për rishqyrtim në Kuvend.
Raporti i Avokatit të Popullit ka ngritur shqetësime lidhur me transparencën, llogaridhënien dhe respektimin e të drejtave të njeriut nga Dhomat e Specializuara, duke shkaktuar reagime nga përfaqësues politikë.
Pas votimit në Kuvend, ligji për Dhomat e Specializuara tani është në duar të presidentes Shiroka-Pula, e cila do të vendosë nëse do ta dekretojë apo do ta kthejë për shqyrtim.
Kuvendi i Kosovës ka konfirmuar se deri në orën 16:00 të ditës së fundit për ankesa, nuk ka pasur asnjë ankesë.
Kështu, pritet që kryetarja e Kuvendit ta nënshkruajë ligjin dhe t’ia dërgojë presidentes, e cila ka tetë ditë për të marrë vendim.
Gjatë publikimit të raportit të Avokatit të Popullit, Naim Qelaj diskutoi për punën e Dhomave të Specializuara në Hagë, duke shprehur shqetësime për funksionimin e kësaj gjykate.
Ai theksoi se nuk i është mundësuar asnjëherë vizita në hapësirat e paraburgimit në Hagë. “Unë i bëj thirrje faktorit ndërkombëtar, BE-së dhe Këshillit të Evropës që të kenë kujdes të shtuar, ta analizojnë dhe vlerësojnë punën e kësaj gjykate, nëse po i përmbahet qëllimit për të cilin është themeluar dhe standardeve që vetë këto vende i zbatojnë në shtetet e tyre, që lidhen me garantimin procedural në proceset gjyqësore, si dhe të garantojnë që një mekanizëm që vetë e kanë krijuar dhe financojnë të mos i shkelë të drejtat e njeriut,” tha ai.
Qelaj po ashtu theksoi se përveç Komitetit Ndërkombëtar të Kryqit të Kuq, asnjë institucion apo organizatë tjetër ndërkombëtare nuk e monitoron punën e Speciales, duke kritikuar mungesën e llogaridhënies së kësaj gjykate ndaj institucioneve të Kosovës dhe duke ngritur shqetësime për transparencën e saj.
Arsim Bajrami, njohës i çështjeve kushtetuese, gjithashtu ka kritikuar funksionimin e Speciales. “Tani ne kërkojmë që në procesin e ankimimit BE-ja, Këshilli i Evropës, shtetet donatore që e financojnë, ta bëjnë atë që s’e kanë bërë deri më tani: të kërkojnë llogaridhënie për të gjitha ato mjete buxhetore që i kanë dhënë për një gjykim të drejtë dhe të ushtrojnë një monitorim të respektimit të të drejtave të njeriut,” theksoi Bajrami.
Përfaqësues të Partisë Demokratike të Kosovës dhe të Aleancës për Ardhmërinë e Kosovës gjithashtu kanë shprehur shqetësime për vendimin ndaj Hashim Thaçit, Kadri Veselit, Jakup Krasniqit dhe Rexhep Selimit. “Ne kemi një vendim për dënimin e katërshes së UÇK-së në Hagë, ndërkohë që çfarë shohim, jo vetëm prej raportit të Avokatit të Popullit, por edhe nga raporti i britanikëve, flasin për shkelje serioze.
Këtë e kanë votuar në Kuvend dhe vendimi në fund është marrë në emër të popullit të Kosovës,” tha Blerta Deliu nga PDK. “Do të duhej që edhe ne në Kuvend, edhe në Komisionin për Legjislacion, por edhe institucionet e tjera, të kemi një qasje bukur serioze,” theksoi Besnik Tahiri nga Aleanca.
Raporti i Avokatit të Popullit ka ngritur shqetësime edhe për pranimin dhe administrimin e provave nga Serbia, si dhe për materialet e tjera, duke vënë në pikëpyetje besueshmërinë e procesit.
Për këtë arsye, raporti rekomandon që Kuvendi dhe Qeveria e Kosovës të krijojnë një mekanizëm të pavarur për monitorimin e procedurave gjyqësore në Hagë, si dhe t’u adresojnë shqetësimet e identifikuara Këshillit të Evropës dhe mekanizmave të tjerë ndërkombëtarë.
Avokati i Popullit u ka bërë thirrje Dhomave të Specializuara që t’i publikojnë të gjitha raportet e komunikimit me shtetet donatore, për të siguruar transparencë dhe akses për publikun.
Burimi origjinal i informacionit: zeri .info
