Qeveria e Kosovës ka ndarë mbi 1.8 milion euro për Këshillin Kombëtar Shqiptar (KKSH) në Luginën e Preshevës, në mbështetje të projekteve dhe programeve që synojnë përmirësimin e situatës për shqiptarët në Preshevë, Bujanoc dhe Medvegjë.
Vendimi për ndarjen e këtyre mjeteve është marrë gjatë mbledhjes së shtatë të Qeverisë, pas kërkesës së KKSH-së të datës 6 tetor 2026.
Për këtë vendim kanë reaguar kryetari i KKSH-së, Enkel Rexhepi, deputeti shqiptar në Kuvendin e Serbisë, Shaip Kamberi, dhe kryetarja e Komunës së Preshevës, Ardita Sinani, të cilët shprehën falënderime për Qeverinë e Kosovës për mbështetje të vazhdueshme ndaj shqiptarëve të Luginës.
Enkel Rexhepi theksoi se mbështetja financiare për KKSH-në është rikthyer për herë të tretë për shqyrtim, pas bllokimeve nga Serbia në janar dhe gusht.
Ai garantoi se KKSH-ja do të angazhohet që këto mjete të arrijnë te përfituesit dhe sqaroi se ato lidhen me 129 projekte dhe katër programe.
Sipas Rexhepit, këto programe përfshijnë sigurimin e librave falas, praktikën profesionale për të rinjtë, funksionimin e Këshillit Kombëtar Shqiptar dhe avokimin për të drejtat e shqiptarëve në Preshevë, Bujanoc dhe Medvegjë.
Ai vlerësoi se bllokimi i mbështetjes ndikon direkt te nxënësit, të rinjtë, organizatat dhe jetën institucionale të komunitetit shqiptar.
Rexhepi e falënderoi kryeministrin Albin Kurti dhe Qeverinë e Kosovës për përkushtimin dhe këmbënguljen, duke theksuar se Këshilli do të ndjekë procesin deri në realizimin e mbështetjes.
Kryetari i PVD-së, Shaip Kamberi, e cilësoi rikthimin e çështjes për herë të tretë si një dëshmi të këmbënguljes për të siguruar mbështetje për shqiptarët e Luginës.
Ai kritikoi autoritetet serbe për ndarjen e mjeteve për serbët e Kosovës, ndërsa theksoi se bllokimi i mbështetjes financiare të Kosovës për shqiptarët e këtij rajoni është i padrejtë.
Kamberi e përmendi gjithashtu deklaratën e presidentit serb, Aleksandar Vuçiq, se për Kosovën ndahen çdo vit 700 deri në 820 milionë euro.
Kamberi theksoi se mbështetja për 129 projektet dhe katër programet e KKSH-së ka qëllime dhe përfitues të qartë. “Mbështetja për qytetarët nuk mund të jetë e drejtë për njërën palë dhe të trajtohet si kërcënim kur u dedikohet shqiptarëve”, theksoi ai, duke kërkuar standarde dhe trajtim të barabartë.
Ai gjithashtu falënderoi kryeministrin Kurti dhe Qeverinë e Kosovës për angazhimin e vazhdueshëm dhe premtoi se do të insistojnë derisa mbështetja të arrijë te përfituesit.
Kryetarja e Komunës së Preshevës, Ardita Sinani, e vlerësoi mbështetjen financiare për vitin 2026 si thelbësore për jetën e qytetarëve të Luginës.
Sipas saj, këto mjete janë të domosdoshme për sigurimin e librave për fëmijët, krijimin e mundësive për të rinjtë dhe realizimin e projekteve në dobi të shqiptarëve.
Ajo theksoi se bllokimi i mjeteve ua mohon këto mundësi qytetarëve që kanë më së shumti nevojë për mbështetje.
Sinani bëri të ditur se do të vazhdojnë angazhimin, së bashku me KKSH-në, për të siguruar që mbështetja të arrijë te shqiptarët e Luginës. “Qytetarët tanë nuk duhet të mbeten peng i bllokimeve”, përfundoi ajo, duke falënderuar Qeverinë e Kosovës.
Ndarja e mjeteve nga Qeveria e Kosovës ka për qëllim mbështetje të funksionimit institucional të KKSH-së dhe realizimin e projekteve të dedikuara për komunitetin shqiptar në Preshevë, Bujanoc dhe Medvegjë.
Burimi origjinal i informacionit: zeri .info
