Në protestën me moton “Jo në emrin tim”, që u mbajt në shesh për të shprehur pakënaqësinë ndaj aktgjykimit të Dhomave të Specializuara në Hagë për ish-krerët e Ushtrisë Çlirimtare të Kosovës, Lavdie Gradica, vajza e mjekut të rënë gjatë luftës, Dr.
Lec Gradica, mbajti një fjalim emocionues.
Gradica theksoi rolin e babait të saj si mjek gjatë luftës, duke trajtuar të plagosurit dhe duke iu përgjigjur thirrjes së atdheut.
Ajo shprehu krenarinë për pjesëmarrjen e tij në luftë, por gjithashtu ndjeu dhimbje për sfidat që populli ynë vazhdon të përballet për të dëshmuar pafajësinë e atyre që luftuan për liri. “Sa krenare ndihem të flas para jush për pjesën më të lavdishme të historisë sonë, po aq dhimbje ndiej që, kaq vite pas luftës së lavdishme të UÇK-së, si popull ende po orvatemi t’i dëshmojmë botës se bijtë dhe bijat e kësaj toke, të cilët morën armët në dorë për të mbrojtur tokat tona, për të mbrojtur jetët tona dhe për të na sjellë lirinë, janë të pafajshëm”, tha ajo.
Gradica vazhdoi të flasë për angazhimin e babait të saj si mjek në malet e Qyqavicës deri në rënien e tij më 24 shtator 1998. “Babai im ishte mjek në luftë.
Ishte aty për t’i shpëtuar jetët e të plagosurve, për t’i ndihmuar njerëzit dhe për t’i shërbyer popullit të tij.
Edhe babi, si shumë liridashës dhe si mantelbardhë, iu përgjigj kushtrimit të atdheut qysh në ilegalitet, pa iu trembur syri”, deklaroi ajo.
Ajo përmendi gjithashtu që familja e saj përballoi humbje të mëdha gjatë luftës. “Unë jam rritur me mungesën dhe dhimbjen e një familjeje që humbi figurën atërore.
Por jam rritur edhe me krenarinë se ai zgjodhi të ishte aty ku Kosova kishte më së shumti nevojë për të”, tha Gradica.
Gradica iu referua aktgjykimit të Dhomave të Specializuara, duke theksuar se familjet e dëshmorëve dhe mbështetësit e tyre nuk do të lejojnë që historia e luftës të rishkruhet. “Ne e respektojmë drejtësinë.
Por drejtësia duhet të jetë e drejtë.
Sot, nga ky shesh, dua t’u them atyre që janë në Hagë: ju nuk jeni vetëm.
Pas jush janë familjet e atyre që u flijuan, pas jush janë fëmijët që u rritën pa prindërit e tyre, pas jush janë mijëra njerëz dhe gjithë populli liridashës që e kujton luftën e UÇK-së dhe sakrificën ndër shekuj”, theksoi ajo.
Në përfundim, Gradica theksoi se kërkesa e familjeve të dëshmorëve dhe protestuesve është për drejtësi, jo për privilegje. “Ne nuk kërkojmë privilegj.
Ne nuk kërkojmë hakmarrje.
Ne kërkojmë drejtësi.
Në emër të dëshmorëve, për familjet tona dhe për ju që sot prisni drejtësinë në Hagë.
Duam drejtësi për çlirimtarët!
Lavdi të gjithë atyre që dhanë jetën për atdheun!”, përfundoi ajo.
Nënkryetari i OVL UÇK-së, Gazmend Syla, gjithashtu mbajti një fjalim para protestuesve, duke kërkuar drejtësi për ish-pjesëtarët e Ushtrisë Çlirimtare të Kosovës.
Ai ngriti shqetësime mbi peshën e dosjeve të Serbisë në proceset gjyqësore në krahasim me dëshmitë e zyrtarëve amerikanë dhe anglezë. “Si ka mundësi të jenë më të besueshme për këtë gjykatë dosjet e Serbisë, më shumë se dëshmitë e zyrtarëve amerikanë dhe anglezë.
Kurrë nuk keni pasur dhe nuk do të keni aleatë më besnikë se ushtarët e UÇK-së”, tha Syla.
Ai bëri thirrje për drejtësi nga bota demokratike, duke theksuar se nuk kërkojnë favore, por drejtësi të pastër. “Sot nga ky shesh i mbushur me zemra që rrahin për atdheun, i bëjmë thirrje gjithë botës demokratike.
Ne nuk kërkojmë favore, por drejtësi të pastër si loti, sepse nuk ka gjykatë në këtë rruzull tokësor që mund ta zhbëjë të vërtetën e pastër, të gjakut tonë për liri”, u shpreh ai.
Ismail Tasholli nga platforma “Liria Ka Emër” gjithashtu foli para protestuesve, duke theksuar se ata janë mbledhur për UÇK-në dhe jo për parti politike. “Jemi mbledhur këtu për ju, për UÇK-në, jemi bërë bashkë për të çuar një mesazh të rëndësishëm.
Varri i dëshmorit nuk ka parti politike dhe liria nuk ka parti politike”, tha Tasholli.
Protesta nisi me mijëra qytetarë që brohorisnin “UÇK, UÇK”, duke shprehur mbështetje për ish-krerët e UÇK-së.
Burimi origjinal i informacionit: zeri .info
